ԱԺ «Ժառանգություն» և ՀՅԴ խմբակցությունների պատգամավորներն այսօրվա խորհրդարանական ճեպազրույցների ժամանակ ահազանգեցին երեկ երեկոյան տեղի ունեցած հայ ձկնաբույծների արտակարգ համագումարի և այնտեղ հնչած մտահոգությունների մասին:
«Ժառանգություն» խմբակցության ղեկավար Ստեփան Սաֆարյանը նշեց, որ ձկնաբույծների համառ աշխատանքի շնորհիվ կայացած ոլորտը, ինչպես տնտեսության և արդյունաբերության այլ ոլորտներ, հայտնվել է օլիգարխների ուշադրության կենտրոնում: Ըստ Սաֆարյանի` նրանք փորձում են ուղղակի օգտագործել պետական կառավարման մարմինների վրա ունեցած իրենց ազդեցությունն ու դուրս մղել դաշտից մնացած ձկնաբուծարանները: «Ժառանգություն» խմբակցության ղեկավարը նշեց, որ այս հարցն անհապաղ պետք է քննարկվի և լուծում ստանա ինչպես գործադիր, այնպես էլ օրենսդիր մարմիններում, այլապես իրենց կմնա հայտարարություն անել, որ հերթական ոլորտը, որը յուղոտ պատառ է դարձել, շահութաբեր է, պարզապես փորձ է արվում դնելու խոշոր օլիգարխների սպասարկման ներքո:
«Այդ մարդիկ ԱԺ պատգամավորներ են, կուսակցապետեր, այնպես որ` մեկ անուն չէ»,- ասաց Ստեփան Սաֆարյանը:
ՀՅԴ խմբակցության պատգամավոր Արծվիկ Մինասյանը թեմայի շուրջ հավելեց, որ վերոնշյալ համագումարին նախորդել էր մեկ այլ արտահերթ համագումար, որի ժամանակ կառավարության ներկայացուցիչները շատ կոպիտ և տգեղ էին իրենց պահել` ձկնաբույծներին անհամաչափ պահանջներ ներկայացնելով, ինչի հետևանքով Հայաստանում ստեղծվելու էր ևս մեկ ոլորտ, որտեղ մենաշնորհներն իրենց թագավոր էին զգալու:
«Քննարկումների ժամանակ հնարավորություն կստեղծվի բացահայտելու մարդկանց, ովքեր ցանկություն ունեն մենաշնորհել ոլորտը»,- նշեց Մինասյանը:
