«Բավական բարդ է Մերձավոր Արևելքի պես տարածաշրջանի վերաբերյալ կանխատեսումներ կատարելը»,-«Առաջին Լրատվական»-ի հետ զրույցում ասաց արաբագետ Արմեն Պետրոսյանը՝ հավելելով, որ Սիրիայից ամերիկյան զորքերի դուրս բերման պատճառով 2019 թվականին ականատես կլինենք բավական լուրջ գործընթացների:
Նրա խոսքով՝ ԱՄՆ-ի հեռացումից հետո Սիրիայում առաջանալու է վակուում, որը փակելու անհրաժեշտություն է լինելու, և այդ վակուումը փակելու համար արդեն իսկ առկա է որոշակի կանխատեսման միջավայր. հիմնական մրցակցությունն ընթանալու է Թուրքիայի և սիրիական կառավարական ուժերի միջև: «Բնականաբար, երբ խոսում ենք սիրիական կառավարական ուժերի մասին պետք է նկատի ունենալ նաև նրանց թիկունքում կանգնած արտաքին դերակատարներին՝ Իրանին և Ռուսաստանին, առանց որոնց այս գործընթացը, բնականաբար, իր ավարտին չի հասնի»,-ասաց Պետրոսյանը՝ ընդգծելով, որ խնդիրներ կծագեն նաև այս երեք դերակատարների միջև:
Մեր զրուցակիցը նաև նշեց, որ գրեթե բոլոր դերակատարների համար գերխնդիր է Սիրիայի տարածքային ամբողջականության պահպանումը: «Մասնատումն առաջին հերթին ձեռնտու չէ Թուրքիային և Իրանին, քանի որ Սիրիայի մասնատումը տրամաբանորեն կարող է հոգեբանական և շղթայական ռեակցիայով տարածվել այդ երկրների վրա՝ հաշվի առնելով քրդական գործոնի առկայությունը»,-կարծիք հայտնեց Պետրոսյանը՝ հավելելով, որ Սիրիայի տարածքը բաժանված կլինի ազդեցության երեք գոտու՝ ռուսական, թուրքական, իրանական:
Պետրոսյանը նաև հույս հայտնեց, որ 2019թ. Հայաստանի մերձավորարևելյան քաղաքականությունն ավելի ակտիվ կլինի, քան անցած տարի: «Շատ կարևոր հանգամանք կա. գոնե Մերձավոր Արևելքի ուղղությամբ մեր շահերը չեն փոխվել, խնդիրները, մարտահրավերները նույնն են, հնարավորությունները ևս նույնն են, ուստի կա պարզապես ընդլայնելու հնարավորություն՝ այդ գործընթացի հիմքում ունենալով պետական, ազգային շահը»:
Ավելի մանրամասն՝ տեսանյութում