Դեկտեմբերի 27-ին տեղի կունենա Փաշինյան – Պուտին հանդիպումը: Հիմնականում ի՞նչ հարցեր կքննարկվեն և ի՞նչ կարելի է սպասել այս հանդիպումից. քաղաքագետ Նժեդեհ Հովսեփյանը թեմայի շուրջ «Առաջին լրատվական»- ի հետ զրույցում անդրադառնալով այս հարցին, նշեց. «Միջազգային դիվանագիտական հարաբերություններում կա պրակտիկա, որ այդպիսի հանդիպումներից առաջ չի մանրամասնվում հանդիպման օրակարգը, հատկապես դա նկատելի է ՌԴ-ի հետ հարաբերություններում: Առկա ինֆորմացիոն հոսքերից ենթադրվում է, որ կքննարկվի ՀԱՊԿ գլխավոր քարտուղարի, ինչպես նաև գազի գնի հարցը: Մի քանի ամիս առաջ խոսակցություն եղավ այն մասին, որ գազի գինը կարող է իջնել, բայց վերջերս ռուսական ինֆորմացիոն արտահոսքերը հուշում են, որ գազի գնի թանկացման մասին խոսակցություն կա, նաև հայկական մամուլում այդպիսի տեղեկություն հրապարակվեց, թե որքանով են այդ տեղեկությունները հիմնավոր, պարզ կլինի այդ հանդպումից հետո:
Հավանաբար օրակարգում հիմնականում այս երկու հարցերն են լինելու, կարելի է ենթադրել, որ փոխզիջման քայլեր կլինեն. Ռուսաստանը հասկանում է, թե գազը Հայաստանի համար ինչ նշանակություն ունի, այն էներգիայի, թերևս, միակողմանի աղբյուր է դարձել Հայաստանի համար, և ռուսական իշխանությունների պակերացմամբ՝ այդ փաստը հաշվի առնելով՝ հնարավոր կլինի ՀԱՊԿ քարտուղարի ընտրության հարցում Հայաստանին մղել փոխզիջումների»:
Ն. Հովսեփյանի կարծիքով՝ Փաշինյանն այս հանդիպման ժամանակ Ադրբեջանին զենք վաճառելու հարցը ևս առաջ կքաշել. «Եթե Ռուսաստանի իշխանությունը գազի գնի և ՀԱՊԿ գլխավոր քարտուղարի հարցն առաջ քաշի, հայկական կողմն էլ իր քարտերը պետք է որոշակիորեն բացի այն հարցերով, որտեղ մտահոգություն է տեսնում Ռուսաստանի քաղաքականության և հայ-ռուսական հարաբերությունների համատեքստում:
Ակնհայտ է, որ Ռուսաստանը զենք վաճառելով թե՛ Հայաստանին, թե՛ Ադրբեջանին՝ կոնֆլիկտն իր վերահսկողության ներքո է պահում: Հայաստանը պետք է խոսի նաև այդ հարցի բարոյական կողմի մասին. ՌԴ-ի և Բելառուսի կողմից Ադրբեջանին զենք վաճառելն անթույլատրելի է առնվազն դաշնակցային հարաբերությունների՝ ՀԱՊԿ անդամ լինելու հիմքով, մինչդեռ ՀԱՊԿ անդամ երկրները շատ ավելի լավ հարաբերություններ ունեն մեր հակառակորդի հետ, զենք են վաճառում նրան, և փաստորեն ՀԱՊԿ անդամ երկրի՝ Հայաստանի անվտանգությունը դրանով խաթարվում է»:
Մանրամասն՝ տեսանյութում: