2018 թվականի հայկական սպորտի ամենացավալի և ամոթալի դրվագներից էր հայկական բռնցքամարտի պառակտումը: Վստահ լինելով, որ Արթուր Գևորգյանը Հայաստանի բռնցքամարտի ֆեդերացիայի նախագահ է ընտրվել ապօրինի բռնցքամարտի մի խումբ գործիչներ հիմնել է այսպես ասած այլընտրանքային ֆեդերացիա: Գևորգյանի կառույցից դուրս եկած բռնցքամարտիկներն ու մարզիչները պահանջում են ֆեդերացիայի նախագահի նոր ընտրություն: Վերջերս ՀԱՕԿ գլխավոր քարտուղար Հրաչյա Ռոստոմյանը Facebook-ի իր էջում հայտարարություն էր տարածել, որտեղ հայտնել է, որ ԱԻԲԱ-ն Հայաստանի բռնցքամարտի ֆեդերացիայից պահանջել է անցկացնել նոր ընտրություններ:
«Հայկական բռնցքամարտի անվանի ներկայացուցիչների բարձրացրած բողոքի պատճառով ԱԻԲԱ-ն սկսեց օգոստոսի 2-ին կայացած ընտրությունների ուսումնասիրման գործընթաց:Այժմ քննությունն ավարտվել է, և ցավոք ինչպես կանխատեսել էի, ունենք ցավալի պատկեր: Քննության ավարտից հետո ԱԻԲԱ-ն հրապարակել է հետաքննության արդյունքները, որում մասնավորապես նշվում է, որ տվյալ ընտրությունները կազմակերպվել են մի շարք խախտումներով, և չեն համապատասխանում ԱԻԲԱ-ի կանոնադրությանն ու կանոններին:Այդ իսկ պատճառով ԱԻԲԱ-ն պահանջում է Հայաստանի բռնցքամարտի ֆեդերացիայից հարգել ԱԻԲԱ-ի կանոնադրությունը և անցկացնել նոր ընտրություններ, որոնցում ԱԻԲԱ-ն կնշանակի նաև հատուկ հանձնակատար՝ ընտրությունների ընթացքին հետևելու համար, այլապես Հայաստանի ազգային ֆեդերացիան կհեռացվի բռնցքամարտի միջազգային միությունից: Ինչպես իմ նախորդ հայտարարություններում այս առիթով նշել էի, մինչև վերոնշյալ քննությունը չավարտվեր, ոչ ոք իրավունք չուներ հանդես գալու վաղաժամ՝ ուստի և դատարկ հայտարարություններով՝ անդառնալի վնաս պատճառելով միջազգային ասպարեզներում Հայաստանի բռնցքամարտի բարի համբավին»,- ասված էր Ռոստոմյանի հայտարարության մեջ: Ավելի վաղ աղմկահարույց հայտարարությամբ էր հանդես Արթուր Գևորգյանը:
Վերջինի խոսքով` բռնցքամարտի մյուս ֆեդերացիան կաշառք է առաջարկել մարզիկներին, որ չմասնակցեն Հայաստանի առաջնությանը. «Այս կերպ այդ ֆեդերացիան պարզապես կործանում է, այդ երեխաների ապագան: Այս առաջնությանը չի մասնակցում Նարեկ Մանասյանը: Նրա հետ կապված մեր ֆեդերացիան բացառիկ ներդրում ունի: Ես հասկանում եմ, որ այդ քաշային կարգում լուրջ մրցակցություն կա և գուցե վախն է պատճառը նրա չմասնակցության: Որևէ այլ ֆեդերացիա, բացառությամբ այսօր Հայաստանի առաջնությունն անցկացնող ֆեդերացիայի, կապ չունի սիրողական բռնցքամարտի հետ: Լավ երևույթ չէ, որ նույն մարզաձևի երկու ֆեդերացիա կա, դրա արդյունքում կորչում է որակը: Բայց եթե մարզիկներն ուզում են մասնակցել աշխարհի, Եվրոպայի առաջնություններին, կամ Օլիմպիական խաղերին միակ ճանապարհը Հայաստանի բռնցքամարտի ֆեդերացիան է և այս առաջնությունը»,- նշել էր Գևորգյանը:
Հայաստանի բռնցքամարտի ֆեդերացիայի նախագահի կողմից սա ըստ էության հաղորդում էր հանցագործության մասին: Կաշառքի դիմաց մարզական միջոցառմանը չմասնակցելը ոչ միայն սպորտային այլև քրեական հանցագործություն է: Առաջնությունը կարելի է բոյկոտել, բայց տեղի ունեցող զարգացումները ոչ միայն մտահոգիչ են, այլև կարող են կործանարար հետևանք ունենալ: Միայն այլընտրանքային ֆեդերացիա ստեղծումը կարող է վերջնական հարված հասցնել հայկական բռնցքամարտին: Բնական է, որ ԱԻԲԱ-ն հետևում է մեր երկում ծավալված իրադարձություններին և խնդիրը չկարգավորելու դեպքում կարող է կտրուկ որոշումներ կայացնել: Ընդհանուր հայտարարի չգալու դեպքում ԱԻԲԱ-ն կարող է լուրջ պատժամիջոցների դիմել՝ ընդհուպ մինչև Հայաստանի հավաքականների որակազրկում: Դա ոչ միայն կհեղինակազրկի հայկական բռնցքամարտը, այլև հայկական սպորտը: Նշենք, որ 2019 թվականը նախաօլիմպիական տարի է և մեր բռնցքամարտիկները պետք է պայքարեն 2020 թվականի ամառային օլիմպիական խաղերի ուղեգրերի համար: Ստեղծված իրավիճակը արդեն իսկ վտանգում է հայ բռնցքամարտիկների մանսակցությանը եկող տարի կայանալիք Օլիմպիական խաղերի:Խնդիրը միայն ու միայն պետք է կարգավորվի բանակցությունների արդյունքում: Կրկին պետք է նշել, որ այս պահին ամենավտանգավորը նոր ֆեդերացիայի գոյությունն է:
Նշենք նաև, որ խնդրի կարգավորման գլխավոր պատասխանատուներն են Արթուր Գևորգյանը և սպորտի նախարարն, ինչպես նաև ՀԱՕԿ-ի նախագահ Գագիկ Ծառուկյանը: Հիշեցնենք, որ Գևորգյանը հայտարարել էր, որ մտադիր է առաջադրվել ՀԱՕԿ նախագահի պաշտոնում. «Եթե ես նախկինում տարակուսում էի ՀԱՕԿ նախագահի պաշտոնում 2020 թվականին իմ թեկնածությունը դնելու հարցում, ապա այսօր հայտարարում եմ, որ ես դնելու եմ թեկնածությունը ՀԱՕԿ նախագահի պաշտոնում», -նշել էր Գևորգյանը: Այս հայտարարությունը խոսում է այն մասին, որ Գևորգյանը մտադիր չէ զիջել դիրքերը: Ավելին, Հայաստանի բռնցքամարտի ֆեդերացիան՝ ի դեմս Գևորգյանի, մարտական է տրամադրված: Փոխզիջումների գնալուն կարծես հակված չէ նաև Ծառուկյանը: