«Քվեն ուժ է» 22 ՀԿ-ների միավորման համար Արտաշատում և Արարատում հուլիսի 3-ին կայանալիք քաղաքապետի ընտրություններն իսկական նվեր են։ Ինչպես նշում է ՀԿ անդամ Նելլի Բաղդասարյանը, չեն կարող անցկացվել արդար հանրապետական ընտրություններ, եթե կեղծվում են տեղականները։ ՀԿ անդամները նշված ընտրատարածքներում անցկացրել են հարցումներ և ուսումնասիրություններ, որոնց արդյունքում պարզվել է, որ այս քաղաքներում քաղաքական մշակույթը իսպառ բացակայում է: Թեկնածուները կարծես ոչ թե ընտրության են գնում, այլ ռազմի դաշտ:
Արտաշատում թեկնածուներից մեկը, որը նաև գործող քաղաքապետն է, ՀԿ-ի այն հարցին, թե որն է ամենամեծ ձեռքբերումը, պատասխանել է՝ 24-ժամյա ջրամատակարարումը, մինչդեռ այդ ժամանակ քաղաքապետարանում ջուր չի եղել:
Արարատում քաղաքապետի թեկնածուներից մեկը հարցին, թե ինչ է անելու ընտրողներին գրավելու համար, պատասխանել է, որ այս ընտրություններում ընտրակաշառք չի բաժանելու։
«Հասարակությունն անտարբեր է ընտրությունների հանդեպ, մեր հասարակության մեծագույն թերությունը իրազեկվածության պակասն է և քաղաքացիական գիտակցության բացակայությունը»,- ասում է «Քվեն ուժ է» ՀԿ անդամ, սպառողների միության նախագահ Արմեն Պողոսյանը: Հիշեցնենք, որ «Քվեն ուժ է» ՀԿ-ն պետք է դիտորդական առաքելություն անցկացնի:
