«Եթե գործ չանենք, ժողովուրդը կգա մեր հետևից, ու այս անգամ գուցե եղաններով». այս միտքն «Առաջին լրատվական»- ի հետ զրույցում արտահայտել է «Իմ քայլը» դաշինքից ընտրված պատգամավոր, վարչապետի խորհրդական Վարազդատ Կարապետյանը: Նրա խոսքով՝ մարդիկ շատ մեծ ակնկալիքներ ունեն, մարդիկ հասկացել են, որ հիմա իրավիճակի տերն իրենք են. «Ժամանակ չունենք, պարտավոր ենք աշխատել: Անկախ նրանից, թե որ կուսակցությունից ենք և ինչ քաղաքական հայացքներ ունենք, բոլորս պետք է նստենք սեղանի շուրջ, հասկանանք, թե երկիրն ինչպես ենք առաջ տանելու: Բոլոր ոլորտներում բազմաթիվ խնդիրներ ունենք, այնպես պետք է անենք, որ մարդիկ չհիասթափվեն»:
Վարազդատ Կարապետյանը հույս հայտնեց, որ նոր ընտրված Ազգային ժողովը կարող է դառնալ լավ աշխատող թիմ, որը ժողովրդի խորքում եղած օրենքը կդարձնի ֆորմալ օրենք մեր երկրում: «Եթե ուզում ենք երկիրն առաջ գնա, մեր բարոյական չգրված օրենքները պետք է բերենք իրավական դաշտ»:
Վ. Կարապետյանի դիտարկմամբ՝ համակարգային կոռուպցիա չկա, այն գլխատված է, բայց պետք է դեռևս շատ աշխատել, որպեսզի կոռուպցիան իսպառ վերանա մեր երկրից. պետք է սկսել կրթական համակարգից՝ սերմանելով, որ կոռուպցիան չարիք է:
Առաջիկայում նոր իշխանության ամենամեծ փորձությունը օպտիմալացման նախագիծն է լինելու, որով նախատեսվում է փոփոխության ենթարկել կառավարության կառուցվածքը. անդրադառնալով այս դիտարկմանը՝ Վ. Կարապետյանը նշեց, որ համակարգն ուռճացված է, և կառավարությունը չպետք է նահանջի կառավարման համակարգերի օպտիմալացման հարցում: «Մենք սկսում ենք կառավարման համակարգերի արդյունավետության բարձրացման գործընթաց, որը ցավոտ գործընթաց կլինի»,- նշեց մեր զրուցակիցը՝ հավելելով, որ օպտիմալացումը մի քանի փուլով կիրագործվի:
Մանրամասն՝ տեսանյութում:
