Երեկ հայտնի դարձան ՀՀ սպորտի և երիտասարդության հարցերի նախարարության կողմից կազմակերպված տարվա 10 լավագույն մարզիկների անունները: Քվեարկությանը մասնակցեցին մարզական լրագրողները, ազգային ֆեդերացիայի ներկայացուցիչները, ինչպես նաև ամփոփվեց SMS քվեարկության արդյունքները:
Լավագույն տասնյակում ընդգրկեցին հետևյալ մարզիկները՝ Արթուր Ալեքսանյանը (հունահռոմեական ըմբշամարտ), Արթուր Թովմասյանը (սպորտային մարմնամարզություն), Ֆերդինանդ Կարապետյանը, (ձյուդո) Վլադիմիր Հարությունյան-Լև Սարգսյան զույգը՝ (ջրացատկ, սինխրոն աշտարակացատկեր) Արսեն Ղազարյանը (սամբո), Մաքսիմ Մանուկյանը (հունահռոմեական ըմբշամարտ), Սիմոն Մարտիրոսյանը (ծանրամարտ), Գոռ Մինասյանը (ծանրամարտ), Գրիգոր Մխիթարյանը ( մարտական սամբո), Էդգար Ստեփանյանը (հեծանվային սպորտ): Միայն լրագրողների և մասնագետների քվեարկության արդյունքում լավագույն տանյակում տեղի էին գըե։ Սիմոն Մարտիրոսյանը (44), Արթուր Ալեքսանյանը (44), Ֆերդինանդ Կարապետյանը (42), Գոռ Մինասյանը (41), Մաքսիմ Մանուկյանը (40), Վլադիմիր Հարությունյանը-Լև Սարգսյանը (39), Էդգար Ստեփանյանը (38), Արթուր Թովմասյանը (28), Արթուր Շահինյանը (23), Հենրիխ Մխիթարյանը (20): Այս արդյունքն ինչ-որ չափով կարելի է օբյեկտիվ համարել, չնայած որ ֆուտբոլի Հայաստանի ազգային հավաքականի կիսապաշտպան Մարկոս Պիզելիի տասնյակում չհայտնվելը անտրամաբանական է և անհասկանալի: Քվեարկությանը մասնակցած անձանց մոտ հավանաբար ազդեցություն է ունեցել այն, որ Պիզելին այնուամենայնիվ հայ չէ:
Ինչպես անցյալ տարի, այդպես էլ երեկ պարադոքսալ կարելի է համարել sms քվեարկության արդյունքները: Մասնավորապես, ամենաշատ ձայները ստացել է սամբոյի աշխարհի առաջնության արծաթե մեդալակիր Գրիգոր Մխիթարյանը` 5699 sms: Մեր մյուս սամբիստը` ԱԱ-ի բրոնզե մեդալակիր Արսեն Ղազարյանը երկրորդ ամենաշատ ձայներն է ստացել` 4146: Այս արդյունքները ոչ այլ ինչ է քան ֆարս, որը նման է պարզունակ բիզնես նախագծի: Դժվար թե գտնվի մեկը, որը կհավատա, որ մեր հասարակությունը դարձել է սամբոյի մեծ սիրահար, իսկ Գրիգոր Մխիթարյանն ու Արսեն Ղազարյանը ամանաճանաչված մարզիկներն են: Որպեզի պատկերն ավելի հստակ լինի «Առաջին լրատվական»-ը հարցում անցկացրեց 100 քաղաքացիների շրջանում: Հարցմանը մասնակցած անձանցից և ոչ մեկը չէր ճանաչում Մխիթարյանին և Ղազարյանին: Ի դեմ, Գրիգոր Մխիթարյանը լավագույն տասնյակում ընդգրկվել էր նաև անցյալ տարի: Այն ժամանակ շատ էր խոսվում, որ սամբոյի ֆեդերացիան 2-3 հազար դոլար ծախսելով և գնելով հեռախոսի քարտեր շահել էր մոտ 20 հազար դոլար: Հիշեցնենք, որ ՀԱՕԿ նախագահ Գագիկ Ծառուկյանը անցյալ տարի տասնյակում տեղ գտած բոլոր մարզիկներին նվիրել էր «Հունդայի» մակնիշի մոտ 10 հազար դոլար արժողության ավտոմեքենաներ: Նշենք նաև, որ անցյալ տարի տասնյակում ընդգրկվել էր մեկ այլ սամբիստ Տիգրան Կիրակոսյանը:
Կարծում ենք ակնհայտ է, որը շահավետ մեխանիզմը գործի է դրվել նաև այս տարի: Հավանական է, որ այս տարի ևս տասնյակում ընդգրկված մարզիկները կստանան ավտոմեքենաներ և դրամական պարգևներ: Մոտ մեկ ամիս առաջ ՀՀ սպորտի նախարարությունը փոխել էր լավագույն մարզիկների ընտրակարգը: Այս անգամ բացի լրագրողներից և քաղաքացիներից քվեարկությանը մասնակցեցին ֆեդերացիաների ներկայացուցիչները: Գրանցված արդյունքները ցույց տվեցին սակայն, որ փոփոխությունները էապես չազդեցին վերջնական արդյունքի վրա քանզի sms քվեարկության արդյունքում կրկին երկու սամբիստ հայտնվեց լավագույն տասնյակում: Ընթերցողներիս, կարծում եմ, չեմ հիասթափեցնի, եթե խոստովանեմ, որ լինելով 15 տարվա մարզական լրագրող՝ երբեք հոդված չեմ գրել սամբոյի, առավել ևս մարտական սամբոյի մասին: Տեղյակ չեմ, թե ով է ամենահայտնի սամբիստը: Հեռուստացույցով երբեք չեմ տեսել, որ սամբո ցուցադրվի:
Առկա իրավիճակում կա երկու լուծում, կամ պետք է ընդհանրապես վերացվի 10 լավագույն մարզիկների մրցումը, կամ գոնե չլինի sms քվեարկություն: Ինչևէ, ունենք այն, ինչ ունենք: 2018 թվականի Հայաստանի 10 լավագույն մարզիկներին շնորհավորելով Ամանորի և Սուրբ ծնունդի կապակցությամբ՝ ցանկանում ենք նորանոր ձեռքբերումներ և նվաճումներ: