«Կոնկրետ պարոն Մելիքյանի և Վերահսկիչ պալատի նախագահի փոխադարձ մեղադրանքների մասին մենք այս պահին ոչինչ չենք ասում, որովհետև դա միջանձնային հարաբերություններ են, և քանի որ հրապարակային գործողությունների տիրույթ է տեղափոխվել, կարծում եմ, այդ հարցի պատասխանն իրենք պետք է տան»,- այսօր խորհրդարանական ճեպազրույցների ժամանակ հայտարարեց ՀՅԴ խմբակցության պատգամավոր Արծվիկ Մինասյանը։
Իսկ ԲՀԿ քարտուղար Արամ Սաֆարյանը այս կապակցությամբ ուշագրավ հայտարարություն արեց. «Սպարտակ Մելիքյանի հետ կապված ՎՊ-ն դատարան է դիմել, և այդ գործը հրապարակային դատավարության ընթացքում կքննարկվի։ Ես տեղյակ եմ նաև, որ Սպարտակ Մելիքյանն իր ասածների վերաբերյալ ունի ծանրակշիռ ապացույցներ, այնպես որ, ոչ մի մեկնաբանություն չեմ անի մինչև հրապարակային դատը»: Անդրադառնալով Հայաստանում առկա կոռուպցիայի խնդրին՝ նա նշեց, որ երկրի ղեկավարությունը քաղաքական կամք ունի կոռուպցիայի դեմ պայքար սկսելու համար։ Թե որտեղից է Արամ Սաֆարյանին հայտնի, որ Մելիքյանը ծանրակշիռ ապացույցներ ունի, մնաց անհայտ: Համենայնդեպս, նա չմանրամասնեց: