Грузия Online-ի փոխանցմամբ՝ ԵԽԽՎ-ն ամառային նստաշրջանի ժամանակ նոր բանաձև է ընդունել Վրաստանի վերաբերյալ։ Վրաստանի ԱԳՆ-ը հաղորդում է, որ հունիսի 24-ի բանաձևը հենված է զեկուցող Դիկ Մարտիի և ԵԽԽՎ դիտարկման կոմիտեի նախագահի տարեկան (2010 թվականի հունիս – 2011 թվականի մայիս) հաշվետվության հիման վրա։
Վրաստանի ԱԳՆ-ի տարածած հաղորդագրության մեջ ասվում է. «Հաշվետվության մեջ նշված են սեփական պարտականությունների իրագործման ուղղությամբ Վրաստանի ունեցած զգալի ձեռք բերումները՝ չնայած գոյություն ունեցող խոչընդոտներին, ինչը պայմանավորված է Ռուսաստանի կողմից Վրաստանի տարածքի օկուպացմամբ։
ԵԽԽՎ-ն հատուկ ուշադրության է արժանացրել 2010 թվականի հոկտեմբերի 15-ին Վրաստանում իրականացված սահմանադրական ուղղումների ընդունումը, ինչի շնորհիվ դատական համակարգը դարձավ ավելի անկախ, զգալիորեն ամրապնդվեց նաև խորհրդարանի դերն ու իշխանությունը, ապահովվեց իշխանական տարբեր ճյուղերի միջև ավելի արդյունավետ և ընդգրկուն փոխվերահսկման համակարգը»։
Այս ամենի հետ մեկտեղ, պաշտոնական Թբիլիսին կիսում է ռուս-վրացական պատերազմի արդյունքների վերաբերյալ դիտարկման կոմիտեի գործունեության շարունակման վերաբերյալ ԵԽԽՎ-ի դիրքորոշումը։ Միևնույն ժամանակ Վրաստանի ԱԳՆ-ը մտահոգություն է հայտնում, որ անհատական դիտարկման արդյունքների ներկայացման ժամկետները հաճախ խախտվում են։
Հիշեցնենք, որ ԵԽԽՎ-ի վերոնշյալ բանաձևում ԵԽԽՎ 14 անդամ երկրներին առաջարկվել է կազմակերպության առջև այդ երկրների ստանձնած պարտականությունների իրագործման պլանը։
Այդ երկրներն են Ալբանիան, Հայաստանը, Ադրբեջանը, Բոսնիա-Հերցեգովինան, Վրաստանը, Մոլդովան, Չեռնոգորիան, Ռուսաստանը, Սերբիան, Ուկրաինան, ինչպես նաև Բուլղարիան, Մոնակոն, Մակեդոնիան, Թուրքիան։
