ՖԻՖԱ-ում սկանդալ է սկսվել այն բանից հետո, երբ պարզ է դարձել, որ ՖԻՖԱ-ի գործկոմի երկու անդամներ պատրաստվել են իրենց ձայները վաճառել` 2018 եւ 2022 թվականների աշխարհի առաջնություններն անցկացնող երկրներին որոշող քվեարկության ժամանակ: The Sunday Times թերթի անցկացրած հետաքննությամբ պարզվել է, որ Օվկիանիայի ֆուտբոլի ֆեդերացիայի նախագահ Ադամուն եւ կոմիտեի նիգերիացի ներկայացուցիչ Թեմարինին պատրաստվում են 500 հազար եւ 1.5 միլիոն ֆունտ ստերլինգով իրենց ձայները վաճառելուն: ՖԻՖԱ-ի համապատասխան պաշտոնյաները խոստացել են հետաքննել այս լուրերը եւ թերթից խնդրել են տրամադրել բոլոր նյութերը: «Պայմանավորվածություններ» ձեռք բերելու պահը լրագրողները ֆիքսել են տեսախցիկով:
Հիշեցնենք, որ 2010թ. դեկտեմբերի 2-ին ՖԻՖԱ-ի կոմիտեն, որն ունի 24 անդամ, կորոշի,թե որտեղ են անցնելու 2018 եւ 2022 թվականների աշխարհի առաջնությունները: 2018թ. թեկնածու երկրներ են Ռուսաստանը եւ Անգլիան, ինչպես նաեւ Բելգիան ու Նիդեռլանդները, Իսպանիան ու Պորտուգալիան: 2022թ. աշխարհի առաջնությունը ցանկանում են իրենց երկրում անցկացնել հարավկորեացիները, քաթարցիները, ինչպես նաեւ ավստրալիացիները. վերջիններս, ի դեպ, հրաժարվեցին 2018թ. մրցույթին մասնակցելուց: