Ռուբեն Հայրապետյանը Ֆեյսբուքում էջ է բացել: Թե՛ ինքնին անեկդոտ է, թե՛ հին ու բարի անեկդոտի նման է՝ մի հատ Ֆեյսբուք կար, էն էլ…:
Ի՞նչ է կորցրել Ռուբեն Հայրապետյանը Ֆեյսբուքում, դժվար է ասել: Չնայած միգուցե ոչ թե Ֆեյսբուքում է կորցրել, այլ կորցրել է կյանքում, ու որոշել է Ֆեյսբուքում գտնել: Հայոց օլիգարխիան որոշել է ասպատակել նաև վիրտուալ տարածությունը: Դե իրական աշխարհը այլևս իրենցով են արել ու հետաքրքրությունը կորցրել, հիմա փորձում են իրենցով անել վիրտուալ տարածությունն էլ:
Մոլախոտն այդպես է՝ սահման չի ճանաչում և ժամանակի ընթացքում մտնում է ամենուր: Ռուբեն Հայրապետյանին հավանաբար կհետևեն մյուս օլիգարխներն էլ, քանի որ Հայրապետյանն էլ ըստ էության առաջինը չէ: Նրանից առաջ Ֆեյսբուքում հաստատվեցին Հովիկ Աբրահամյանը, Երևանի քաղաքապետ Կարեն Կարապետյանը, ԲՀԿ նախագահ Գագիկ Ծառուկյանը: Ով է հաջորդը՝ Թոխմախի Մհերը՞, Ալրաղացի Լյովը՞, Բուռնաշը՞, Լֆիկ Սամո՞ն, ո՞վ:
Երևի չարժե կանխատեսել, կսպասենք մի քանի օր, կամ միգուցե մի քանի շաբաթ, ու կտեսնենք: Հավանաբար իշխանական համակարգը լսելով արաբական հեղափոխությունների մասին «ֆեյսբուքյան հեղափոխություն» արտահայտությունը, մտածել է, որ շտապով պետք է գրանցվել Ֆեյսբուքում, որպեսզի այնտեղ տեղի ունեցող հեղափոխական պրոցեսները կանխվեն: Այդ իսկ պատճառով, ամենայն հավանականությամբ շատ մոտ ապագայում Ֆեյսբուքում կսկսեն գրանցվել նաև օլիգարխների սափրագլուխները: Դե ինչպես կանխես «ֆեյսբուքյան հեղափոխությունը», առանց թիկնազորի, առանց սափրագլուխների:
Իսկ եթե լուրջ, ապա Հայաստանի իշխանական համակարգում հետաքրքիր միտում է նկատվել, և կասկած չկա, որ սա հրաման է կենտրոնից: Ըստ երևույթին, Սերժ Սարգսյանը որոշելով Հայաստանում եվրոպական արժեքներ տարածել, մտածել է, որ ամենից հարմար տարբերակը մականունավոր քրեաօլիգարխիկ տարրերին Ֆեյսբուքում գրանցելն է, ցույց տալու համար, թե ինչպիսի առաջընթաց է արձանագրվել Հայաստանում: Եվ իսկապես, գողական սխոդկաները և ռազբորկաները այլևս չեն կատարվի փողոցներում, տեցիկռուգներում կամ ռեստորաններում ու գիշերային ակումբներում: Այդ ամենը կտեղափոխվի Ֆեյսբուք:
Թեև իհարկե կարելի էր ավելի առաջ էլ գնալ և ստեղծել հատուկ իշխանական սոցցանց, «Ռոժբուք» պայմանական անվանումով, որպեսզի անվանումը պարզ լինի համակարգի բոլոր օղակների համար: «Ռոժբուքը» կարող է դառնալ ներիշխանական հաղորդակցության տեխնոլոգիապես բարձր մակարդակի հարթակ՝ Հայաստանը դարձնելով տարածաշրջանային նոր կենտրոն: