Ֆուտբոլի Եվրոպա լիգայի խաղարկության 6-րդ տուրում Լոնդոնի «Էմիրեյթս» մարզադաշտում տեղի ունեցած «Արսենալ»-«Ղարաբաղ» հանդիպման ժամանակ հայ երկրպագուի իրականացրած ակցիայի շուրջ զարգացումները նոր թափ են ստանում: Հիշեցնենք, որ մրցավեճի վերջնամասում խաղադաշտ էր ներխուժել հայ երիտասարդը, որը ծածանել էր Արցախի դրոշը: Նրա շապիկին պատկերված էր Հայաստանի և Արցախի ազգային հերոս Մոնթե Մելքոնյանի լուսանկարը: Ակցիան իրականացրած մեր հայրենակից Սպարտակը փորձել էր մոտենալ «Արսենալի» պահեստայինների նստարանին և դրոշը հանձնել ֆուտբոլի Հայաստանի ազգային հավաքականի ավագ Հենրիխ Մխիթարյանին:
Վերջինս լոնդոնյան ակումբի հայտացուցակում էր, սակայն տեղ չէր գտել մեկնարկային կազմում: Մարզադաշտի անվտանգության աշխատակիցները տեխնիկական գոտու մատույցներում կանգնեցրել էին մեր երկրպագուին: Սպարտակին փորձել էր մոտենալ նաև «Ղարաբաղի» ավագ Ռաշադ Սադիխովը: «Հանդիպման վերջնամասում տեղի ունեցավ հայկական սադրանք: Ես տեսա, որ «Արսենալի» դարպասի մոտից վազում է մի երիտասարդ՝ անհայտ պետության դրոշը ձեռքին: Ես անմիջապես վազեցի նրա ուղղությամբ, որ խլեմ նրա ձեռքից այդ փալասը: Ինձ կանգնեցրին անվտանգության աշխատակիցները և թույլ չտվեցին մոտենալ սադրիչին: Ցավում եմ, որ տեղի ունեցածը չկարողացանք մենք կանխել»,- ասել էր Սադիխովը: Եվ ահա, այսօր ադրբեջանական մամուլը փորձելով հերոսացնել Սադիխովին գրում է, որ «Ղարաբաղի» ավագն արցունքոտ աչքերով «չափալախել» է հայ սադրիչին: Ավելին նշվում է, որ եթե անվտանգության աշխատակիցները չմիջամտեին ապա Սադիխովը կծեծեր հայ երկրպագուին: Ադրբեջանական մամուլը նշում է նաև, որ ՈւԵՖԱ-ն կարգելի Սպարտակին այլս ներկա գտնվել ֆուտբոլային հանդիպումներին: Այս տեղեկությունը չի համապատասխանում իրականությանը: Երկրպագուի խաղադաշտ ներխուժելու կապակցությամբ ՈՒԵՖԱ-ն այնուամենայնիվ կպատժի «Արսենալին»:
2019 թվականի փետրվարի 21-ին եվրոպական ֆուտբոլային գերատեսչության կարգապահական բաժինը կքննի «Էմիրեյթս» մարզադաշտում տեղի ունեցածը: Ադրբեջանական կողմը նշում է, որ «Արսենալը» ստիպված կլինի մեծ տուգանք վճարել միջադեպի համար: Ադրբեջանական ԶԼՄ-ները սակայն չեն ցանկանում խոսել Սադիխովի, արարքի մասին, որը ևս չի վրիպի ՈւԵՖԱ-ի աչքից: Մասնավորապես, հարևան երկրի ԶԼՄ-ները հրապարակել են մի տեսանյութ, որտեղ «Ղարաբաղի» ավագը մոտենում է հայ երկրպագուին և փորձում հարվածել: Տեսանյութում հստակ չի երևում արդյոք Սադիխովի հարվածը այսպես ասած տեղ է հասնում: Կատարվածը սակայն, որակվել է, որպես արցունքոտ չափալախ: Այս կերպ ադրբեջանցիներն ուղղակիորեն «կրակն են գցում» իրենց թիմին և թիմի ավագին: Տեղի ունեցածը ոչ ֆուտբոլային արարք է, որն ունի նախ քաղաքական մղումներ: Ու հիմա հարց է ծագում, Սադիխովն է չափալախել հայ երկրպագուին, թե ՈւԵՖԱ-ն է չափալախելու «Ղարաբաղին» տեղի ունեցածի համար: Համաձայնվեք, որ հերոսանալու համար կարծում ենք կան այլ եղանակներ: Նկատենք, որ «Ղարաբաղի» ֆուտբոլիստներից միայն Սադիխովը նման կերպ արձագանքեց հայ երիտասարդի իրականացրած ակցիային:
Ավելին «Ղարաբաղի» ավագի խաղից հետո արված արտահայտությունը բացառապես քաղաքական բնույթ է կրում, ինչը ևս հակասում է ՈւԵՖԱ-ի կանոնադրությանը: Ստեղծված իրավիճակում օրինակելի կարելի է համար Հենրիխ Մխիթարյանի պահվածքը: Մեր հավաքականի ավագը կարող էր արձագանքեր ակցիային ինչը կամա թե ակամա ոգևորություն կառաջացներ մեր երկրում: Ավելին հասարակության որոշ շերտեր Մխիթարյանին կհամարեր հերոս: Մեր ֆուտբոլիստը, սակայն, իրեն թույլ չտվեց որևէ կերպ մեկնաբանել ակցիան քանզի ունի պրոֆեսիոնալ ֆուտբոլիստին հատուկ գիտակցություն և տարանջատում է սպորտը քաղաքականությունից: Խաղաղ ակցիա իրականացնելու իրավունք ունի ցանկացած քաղաքացի՝ անկախ մասնագիտությունից: Ֆուտբոլի դաշտը, սակայն, այն հարթությունը չէ, որտեղ կարելի է չափալախ հասցնել ու հերոսանալ:
Փոխաբերական իմաստով չափալախ կարելի է հասցնել միայն մարզական տեսանկյունից, որը պետք է արտահայտվի ջախջախիչ հաղթանակի տեսքով: