Դեկտեմբերի 13-ին Եվրոպա լիգայի խաղարկության խմբային փուլի վերջին տուրում Լոնդոնի «Արսենալը» «Էմիրեյթս» մարզադաշտում կմրցի Ադրբեջանի չեմպիոն «Ղարաբաղի» հետ:
5-րդ տուրից հետո «Արսենալը» 13 միավորով գլխավորում է E ենթախումբը՝ երեք միավորով գերազանցելով երկրորդ հորիզոնականում գտնվող Լիսաբոնի «Սպորտինգին»: Այս երկու թիմերն արդեն իսկ ապահովել են մասնակցությունը փլեյ-օֆում:
Հիշեցնենք, որ «Արսենալի» և «Ղարաբաղի»՝ Բաքվում տեղի ունեցած հանդիպումն ավարտվել էր անգլիական թիմի հաղթանակով՝ 3:0 հաշվով: Այս մրցավեճին հասկանալի պատճառով չէր մասնակցել Հայաստանի ազգային հավաքականի ավագ Հենրիխ Մխիթարյանը, որը չէր մեկնել Ադրբեջանի մայրաքաղաք: Շահարկելով այս փաստը՝ ադրբեջանական կողմը փորձում է արհեստական եղանակներով այնպես անել, որ հայ ֆուտբոլիստը չխաղա «Ղարաբաղի» դեմ նաև Լոնդոնում տեղի ունենալիք խաղին:
Կարծում ենք՝ պարզ է, որ առաջիկա խաղում «Ղարաբաղը» անհաջողության է մատնվելու, հետևաբար ադրբեջանական կողմը փորձում է հասարակության ուշադրությունը շեղել էժանագին երևույթների վրա: Մասնավորապես, «Արսենալի» ֆանատների «London Is Red, Bitches» ֆեյսբուքյան էջում հայտնվել էր սկանդալային մի հրապարակում, որը աղմուկ է բարձրացրել ոչ միայն Անգլիայում: «Լավ կլիներ, որ Լոնդոնը Ադրբեջանի մի մասը դառնար: Այդ դեպքում կարգելվեր Մխիթարյանի մուտքը»,- այս հայտարարությունը հայտնվել է Պրեմիեր լիգայի 13-րդ տուրի «Բորնմութ»-«Արսենալ» հանդիպումից հետո: Այս հրապարակումից րոպեներ անց, սակայն, Ֆեյսբուքի ադրբեջանցի օգտատերերը մեծ ցնծությամբ տարաբնույթ մեկնաբանություններ էին հրապարակել՝ շնորհակալություն հայտնելով անգլիացի ֆուտբոլասերներին:
Հիշեցնենք, որ Պրեմիեր լիգայի 12-րդ տուրում Հայաստանի ազգային հավաքականի ավագը, փոխարինման դուրս գալով, փրկել էր «Արսենալին» պարտությունից՝ գրավելով «Վուլբվեյեմփթոնի» դարպասը: «Բորնմութի» դեմ մրցավեճում Մխիթարյանը թեև չօգտագործեց մի շարք գոլային պահեր, այնուամենայնիվ վատ տպավորություն չթողեց և խաղաց առանց փոխարինման:
Աղմկահարույց հայտարարությունը բնականաբար չէր վրիպել ադրբեջանական լրատվամիջոցների աչքից, որոնք գլխավոր լուրերի շարքում են դասել տեղի ունեցածը: Ադրբեջանական կայքերը շարունակ հիշատակում են այն, որ Մխիթարյանը չէր մեկնել Բաքու՝ մասնակցելու Եվրոպա լիգայի խաղարկության խմբային փուլի «Ղարաբաղ»-«Արսենալ» հանդիպմանը: Ադրբեջանցիները բնականաբար չեն ցանկանում, որ Մխիթարյանը մասնակցի այդ մրցավեճին, առավել ևս՝ գոլ խփի:
Հիշեցնենք, որ 2015 թվականին կրկին Եվրոպա լիգայի խաղարկության խմբային փուլում խաղալով Դորտմուդի «Բորուսիայի» կազմում՝ Մխիթարյանը գրավել էր ադրբեջանական «Գաբալայի» դարպասը, ինչը հարևան երկրում դիտարկվել էր որպես ողբերգություն:
Ադրբեջանական լրատվամիջոցների, ինչպես նաև Ֆեյսբուքում ադրբեջանցի օգտատերերի Լոնդոնի՝ Ադրբեջանի մաս դառնալու գրառման բուռն արձագանքները ստիպում են ենթադրել, որ տեղի ունեցածը ոչ այլ ինչ է, քան էժանագին սադրանք՝ պատվերի տեսքով: Այսինքն՝ «Արսենալ»-«Ղարաբաղ» հանդիպումից առաջ ադրբեջանցիները ցանկանում են էժանագին մանիպուլյացիայի միջոցով հոգեբանական ճնշում գործադրել Հենրիխ Մխիթարյանի վրա՝ հույս ունենալով կանխել նրա մասնակցությունը «Ղարաբաղի» դեմ մրցավեճին:
Նշենք, որ գրառումը կատարվել է «London Is Red, Bitches» էջի ադմինիստրատորի կողմից: «Արսենալի» բրիտանացի ֆանատները, կարելի է ասել, հրապարակմանը չեն արձագանքել:
Հիշեցնենք, որ Եվրոպա լիգայի խաղարկության եզրափակիչը տեղի է ունենալու Բաքվում, և ադրբեջանցիները դեռևս մի քանի ամիս առաջ սկսել էին սպառնալ հայ ֆուտբոլիստին, որ եթե «Արսենալը» դուրս գա եզրափակիչ, ապա Մխիթարյանը չի մասնակցի կարևորագույն այդ խաղին:
Թեև մրցաշարային առումով «Ղարաբաղի» հետ հանդիպումը այնքան էլ կարևոր չէ, այդուհանդերձ մեծ է հավանականությունը, որ Մխիթարյանը կմասնակցի այս մրցավեճին: Ավելին, ենթադրվում է, որ խաղաժամանակ ստանալու դեպքում հայ ֆուտբոլիստը կփորձի վրեժխնդիր լինել ադրբեջանցիների դրսևորած էժանագին երևույթների համար:
«Արսենալի» վերջին երկու հանդիպումներին հայ ֆուտբոլիստը խաղացել էր 90 րոպե: Լոնդոնյան թիմի գլխավոր մարզիչ Ունայ Էմերին Մխիթարյանին ընդմիջումից հետո փոխարինման էր դուրս բերել Պրեմիեր լիգայի 15-րդ տուրի «Մանչեսթեր Յունայթեդի» և 16-րդ տուրի «Հանդերսֆիլդի» հետ մրցավեճերում: Այսինքն՝ Մխիթարյանը դժվար թե ունենա հոգնածության խնդիր: Պրեմիեր լիգայի 17-րդ տուրի հանդիպումն «Արսենալն» անցկացնելու է դեկտեմբերին 16-ին՝ հյուրընկալվելով «Սաութհեմփթոնին»:
Բուքմեյքերներն առաջիկա խաղում բացահայտ ֆավորիտ են համարում «Արսենալին»՝ վերջինիս հաղթանակի համար սահմանելով 1.2 գործակից: Ոչ-ոքին գնահատված է 6, իսկ ադրբեջանական թիմի հաղթանակը՝ 15 գործակցով: