ՀԺԿ առաջնորդ Ստեփան Դեմիրճյանը, «Դե ֆակտո» ակումբում այսօր հրավիրված մամլո ասուլիսում անդրադառնլով Կազանի եռակողմ բանակցություններից հետո ստեղծված իրավիճակին, ասաց, որ դեռ երկու ամիս առաջ «Ժամանակ»-ին տված հարցազրույցում ինքը նկատել էր, որ ղարաբաղյան կարգավորման գործընթացում բեկում չի ակնկալում:
Ստեփան Դեմիրճյանը նշեց նաև, որ գուցե ճնշումները կողմերի վրա ավելանան, սակայն ֆորմատի փոփոխություն տեղի չի ունենա, թեև ԼՂ-ի՝ բանակցությունների սեղանին վերադառնալը ՀԺԿ առաջնորդը կարևորեց:
ՀԱԿ-ից հեռացած որոշ քաղաքական գործիչների տարբեր հայտարարությունների և «Ազատ դեմոկրատների» կուսակցության ստեղծման առիթով Ս.Դեմիրճյանը հայտարարեց, թե չի կարծում, որ այդ կուսակցութունը ստեղծվել է, քանի որ Կոնգրեսը երկխոսության է գնում իշխանությունների հետ, ինչպես փորձում են մեկնաբանել լրագրողները:
Ս.Դեմիրճյանը համաձայն չէ այն կարծիքին, թե Կոնգրեսը կազմաքանդել է ընդդիմադիր դաշտը։ Ընդհակառակը, Ս.Դեմիրճյանը շեշտեց, որ Կոնգրեսը հենց միավորման օրինակ է:
Հանրահավաքին կհետևե՞ն հանրահավաքներ՝ հարցրին լրագրողները. «Այդ մասին կլսեք հաջորդ հանրահավաքին»,- նշեց Ս.Դեմիրճյանը:
