Նախընտրական քարոզարշավի հենց առաջին օրը սկսվեց արցախյան հարցի շուրջ հայտարարություններով, որի շուրջ քննարկումները դեռ շարունակվում են։
ՀՀԿ ցուցակի երրորդ համարը՝ Դավիթ Շահնազարյանը, նախ սկանդալային հայտարարություն է արել Սասուն Միքայելյանի երեկվա ոչ այնքան հաջող ձևակերպման առթիվ։ «Այն, ինչ ասել է Սասուն Միքայելյանը, իրականում քաղաքական ծրագիր է, որն իրականացնում է Նիկոլ Փաշինյանը, այսինքն՝ իշխանություն՝ Արցախի փոխարեն: Սասուն Միքայելյանն ուղղակի արտահայտել է այն, ինչը ներկա իշխանությունների քաղաքականությունն է»,- ասել է նա:
Շահնազարյանը, ըստ էության, շրջանառության մեջ է դնում ռուսական որոշակի շրջանակների ասպարեզ նետած թեզը, ըստ որի՝ հայկական հեղափոխությունը ոչ թե Հայաստանի հասարակության կոնսոլիդացիայի ու պայքարի հետևանք է, այլ արտաքին կենտրոններում մշակված դավադրություն, որի նպատակը Արցախը հանձնելն է։
Արցախի նախագահ Բակո Սահակյանի աշխատակազմի ղեկավարի տեղակալ Դավիթ Բաբայանը, «Առաջին լրատվական»-ի հետ զրույցում անդրադառնալով արցախյան հարցի արծարծմանն ու Շահնազարյանի հայտարարությանը, նշեց. «Մենք չենք ուզում և երբևիցե չենք միջամտել Հայաստանի ներքին քաղաքական գործընթացներին և վստահ եմ, որ Հայաստանն էլ չի միջամտում Արցախի ներքին քաղաքականությունը։ Ուստի, պարոն Շահնազարյանն իր տեսակետն է ներկայացնում»։
Շարունակելով իր միտքը՝ Բաբայանն ընդգծեց. «Արցախը նորագույն շրջանի հայոց պետականության բնօրրաններից է, և հայոց անկախ պետականության վերակերտումը անմիջապես հետևանք է ղարաբաղյան ազգային ազատագրական շարժման։ Այսօր կա հայոց պետականության երկու հատված՝ մայր Հայաստան և Արցախի Հանրապետություն։ Կա մի պարզ ճշմարտություն և պետք չէ ակադեմիկոս լինել դա հասկանալու համար՝ անկախ նրանից, որ կան երկու առանձին պետություններ, և հայոց պետականության հիմք պետք է համարել նաև Սփյուռքը․եթե խարխլվում է սրանցից մեկը, տվյալ դեպքում Արցախի ճակատագիրը կլինի հարցականի տակ՝ միանշանակ է, որ սա բերելու է հայոց պետականության կործանման։ Սա բոլորի համար էլ պարզ է, մենք չենք ասում Արցախի նշանակությունը բարձրացնելու համար։ Արցախի հզորացումը գերնպատակ պետք է լինի բոլորի համար, ցանկացած թերացում անկանխատեսելի հետևանքներ կարող է ունենալ ողջ հայ ժողովրդի համար, որովհետև հակառակորդը՝ Ադրբեջանը չի էլ թաքցնում, որ իր նպատակը ոչ միայն Արցախի կործանումն է, այլ իրենք հայտարարում է, որ Երևանն ու Զանգեզուրը իրենցն է»։
Վերադառնալով Շահնազարյանի հայտարարությանը և մեր այն դիտարկմանը, որ արցախյան հարցը շահարկվում է տարբեր ուժերի կողմից դիվիդենտներ ստանալու համար, Բաբայանն ընդգծեց. «Շահարկումը ճիշտ չէ, ճիշտ չեն նաև տարբեր համեմատությունները։ Բայց այն, որ արցախյան խնդրի շուրջ կարծիքներ հնչելու են՝ միանշանակ է, սա խոսում է խնդրի կարևորության մասին։ Սա հայոց պետականության հիմքն է, մենք կողմնակից ենք, որ դա չշահարկվի, որովհետև կան անժխտելի սրբություններ։ Բայց այն, որ պետք է քննարկվի՝ դա միանշանակ է»։
Քննարկելով արդյո՞ք պետք է ժողովրդին վախեցնել, որ իշխանությունները եկել են Արցախը հանձնելու համար դիտարկմանն ի պատասխան, Դավիթ Բաբայանն ասաց. «Կրկնում եմ՝ մենք այդ գործընթացին չենք միջամտում։ Քննարկում կարող է լինել, բայց ոչ շահարկում։ Քննարկումը պետք է լինի այնպիսին, որ Հայաստանի անվտանգությունն ամրապնդվի, որովհետև եթե վաղը Արցախում վտանգ լինի՝ ողջ հայությունը կգնա այնտեղ, Աստված չանի, եթե Երևանին վտանգ սպառնա՝ Արցախը չի՞ գալու իր կյանքի գնով պաշտպանի, իհարկե գալու է։ Այս գիտակցությունը միշտ պետք է պահել»։