Տևական դադարից հետո Լոնդոնի «Արսենալը» հաղթանակ տարավ Պրեմիեր լիգայում՝ հյուրընկալվելիս 2:1 հաշվով առավելության հասնելով «Բորնմութի» նկատմամբ: Հիշեցնենք, որ մինչ այս Ունայ Էմերիի ֆուտբոլիստները երեք անընդմեջ ոչ-ոքի էին խաղացել համապատասխանաբար «Կրիստալ Փելեսի», «Լիվերպուլի» և «Վուլվերհեմփթոնի» հետ: «Արսենալի» խաղում նկատվում էր լճացում, և սպասվում էր, որ «Բորնմութի» դեմ խաղում Էմերին կդիմի փոփոխությունների:
Երեկ լոնդոնյան ակումբը հանդիպումը սկսեց անսովոր՝ 3-4-2-1 դասավորությամբ: Շեշտը դնելով եզրերի վրա՝ Էմերին միևնույն ժամանակ հագեցրել էր գրոհային արսենալը կենտրոնական հատվածում: Որպես նոմինալ հարձակվող խաղաց Օբամեյանգը, իսկ նրա թիկունքում Մխիթարյանն էր ու Իվոբին: Կարելի է ասել, որ մարտավարական այս փոփոխությունն իրեն արդարացրեց: «Արսենալի» գրոհներն անհամեմատ ավելի սուր էին: Հատկապես վտանգավոր էին հյուրերի գրոհները ձախ եզրից, որտեղ բավական ակտիվ էր Կոլաշինացը: Հենց նրա փոխանցումից հետո Օբամեյանգը դարձավ հաղթական գոլի հեղինակ: Մի փոքր ավելի պասիվ էր աջ եզրը, որտեղ խաղաց Բելերինը: Վերջինիս խաղը չէր ստացվում:
Նկատենք, որ այս դասավորությամբ Էմերին խաղը կառուցել էր առանց կիսապաշտպանության առաջատար Մեսութ Օզիլի: Վերջին հանդիպումներում այս ֆուտբոլիստի անհաջող խաղի արդյունքում խաթարվում էր «Արսենալի» առջևի գիծը: Շատերը Պրեմիեր լիգայում միավորների կորուստը կապում են հենց Օզիլի անհաջող խաղի հետ: Էմերիի այլընտրանքային տարբերակն առաջին փորձից երեք միավոր պարգևեց:
Խաղալով հարձակման խորքում՝ ակտիվ էին Մխիթարյանն ու Իվոբին: Հայաստանի ազգային հավաքականի հարձակվողը մի քանի լավ հնարավորություն ուներ գոլի հեղինակ դառնալու: Հեղինակավոր Whoscօred պարբերականը Մխիթարյանի խաղը գնահատել է 6.7 բալով: Մեր կիսապաշտպանից ավելի ցածր գնահատականի են արժանացել Բելերինը, Իվոբին, ինչպես նաև փոխարինման դուրս եկած երեք ֆուտբոլիստները: Հանդիպման լավագույն ֆուտբոլիստ է ճանաչվել Օբամեյանգը, որն արժանացել է 7.5 գնահատականի:
Մեկ այլ բրիտանական պարբերական՝ Football London-ը, Մխիթարյանին ամենացածր՝ 3 գնահատական տալուց զատ, նաև քննադատության է ենթարկել: «Մխիթարյանի աշխատանքն ու աշխատանքի արդյունքը խաղադաշտում ուղղակի չէին երևում: Նա մի քանի գոլային պահեր փչացրեց: Մխիթարյանը կարող էր հարվածային դիրք դուրս բերել թիմակիցներին, բայց չարեց դա: Ավելին, հիանալի հնարավորություն ձեռքից բաց թողեց հաշիվը 3:1 դարձնելու: Կարճ ասած՝ հայ ֆուտբոլիստը ցուցադրեց աղքատիկ ֆուտբոլ»,- գրել է Football London-ի մեկնաբանը:
Խաղից հետո Էմերին մեկնաբանել է նաև Օզիլին հիմնական կազմից դուրս թողնելու որոշումը. «Այո, բոլորին է հետաքրքրում, թե ինչու Օզիլը մնաց պահեստայինների նստարանին: Մենք որոշեցինք, որ այսպես ավելի լավ հանդիպում կանցկացնենք: «Բորնմութի» դեմ արտագնա մրցավեճը պահանջում էր ֆիզիկական՝ կոշտ պայքար: Մեր թիմում բոլոր ֆուտբոլիստներն էլ իրենց ուրույն դերն ունեն: Այսօրվա խաղի մարտավարությամբ մենք կատարելագործեցինք համագործակցության մակարդակը և կարծում ենք՝ լավ արդյունքի հասանք: Հուսով եմ, որ երկրպագուներն էլ գոհ են թե՛ խաղի որակից և թե՛ հաշվից: Մրցաշրջանի սկզբում մենք միշտ խոսում էինք մրցունակ լինելու մասին: Պետք է լինել կարգապահ, բայց չմոռանալ նաև ֆուտբոլիստների անհատական որակների մասին: Միայն այդպես կարող ենք լուրջ խնդիրներ լուծել»:
Հաղթական գոլի հեղինակ դարձած Օբամեյանգի կարծիքով էլ՝ այս մրցավեճում բեկումնային էր առաջին խաղակեսի վերջնամասում բաց թողած գնդակը: «Երբ գնդակ ընդունեցինք, հասկացանք, որ երկրորդ կեսում անհրաժեշտ է մեծացնել ճնշումը և ավելի ակտիվ գործել: Մենք սթափվեցինք և փոխեցինք խաղը: Կարծում եմ՝ վատ չխաղացինք և լուծեցինք մեր առջև դրված խնդիրը: Անչափ ուրախ ենք, որ որոշակի դադարից հետո հաղթեցինք և տուն ենք վերադառնում 3 միավորով»,- նշել է Օբամեյանգը:
Այս հաղթանակն «Արսենալի» համար կարևոր էր նաև մրցաշարային տեսանկյունից: 13-րդ տուրի կենտրոնական խաղում «Տոտենհեմը» հաղթեց «Չելսիին» և 30 միավորով հանգրվանեց 3-րդ հորիզոնականում: 4-րդ տեղում գտնվող «Չելսին» ունի 28 միավոր և ընդամենը մեկ միավորով է գերազանցում լավագույն հնգյակը եզրափակող «Արսենալին»:
Ի դեպ, հաջորդ հանդիպումը Պրեմիեր լիգայում Էմերիի թիմը անցկացնելու է դեկտեմբերի 2-ին՝ մրցելով հենց «Տոտենհեմի» հետ: Հաղթելու դեպքում զգալիորեն կբարելավվի դիրքը մրցանակային տեղերի համար պայքարում: Մինչ այդ նոյեմբերի 29-ին «Արսենալը» Եվրոպա լիգայի խաղարկության խմբային փուլի 5-րդ տուրում Պոլտավայում մրցելու է «Վորսկլայի» հետ: Այս մրցաշարում «Արսենալն» արդեն իսկ նվաճել է փլեյ-օֆի ուղեգիր, և լոնդոնյան դերբիից առաջ Էմերին կխնայի հիմնական կազմի մի շարք ֆուտբոլիստների: