Մամուլում շրջանառվող տեղեկությունների համաձայն՝ այսօր Փարիզում կկայանա Հայաստանի և Ադրբեջանի ԱԳ նախարարների հանդիպումը՝ ԵԱՀԿ Մինսկի խմբի համանախագահների մասնակցությամբ:
«Առաջին լրատվական»-ի հետ զրույցում ԼՂՀ Արտաքին քաղաքականության և անվտանգության հանրային խորհրդի նախագահ Մասիս Մայիլյանն անդրադարձավ Բաքվի այդ քաղաքականությանն ու դրա նպատակներին:
Նա նշեց, որ պաշտոնական Բաքուն շարունակում է առաջնորդվել «Կա՛մ Ադրբեջանի պայմաններով խաղաղություն, կա՛մ պատերազմ» բանաձևով: Ըստ նրա՝ Ադրբեջանի կողմից դիվերսիոն գործողությունների և դիպուկահարների պատերազմը շարունակելը, հրադադարի ռեժիմը դիտարկելու և վերահսկելու միջազգային մեխանիզմի ստեղծման աշխատանքներից խուսափելն ածանցյալ են վերոնշյալ ադրբեջանական բանաձևից:
«ՄԱԿ-ի գլխավոր քարտուղարի, ԵԱՀԿ գործող նախագահի և միջազգային այլ գործիչների՝ դիպուկահարներին ճակատային գծից հեռացնելու վերաբերյալ կոչերը կարող են լսվել և իրականանալ միայն Ադրբեջանի՝ ռազմական շանտաժի կամ ռազմական դիվանագիտության քաղաքականությունից հրաժարվելու դեպքում:
Հայաստանը և ԼՂՀ-ն արդեն հայտարարել են դիպուկահարներին հետ քաշելու իրենց պատրաստակամության մասին, բայց հայկական պետությունները չեն կարող միակողմանի դիմել այս քայլին:
Ադրբեջանը չի դադարեցրել և շարունակում է սպանություններ գործել հրադադարի գծի ողջ երկայնքով՝ սաստկացնելով առկա լարվածությունը: Ստեղծված իրավիճակում Հայաստանը և ԼՂՀ-ն պետք է ձեռնարկեն ակտիվ հակագործողություններ ոչ միայն ռազմական, այլև քաղաքական-դիվանագիտական հարթությունում»,- նման տեսակետ հայտնեց Մասիս Մայիլյանը:
Նա հավելեց, որ նպատակասլաց աշխատանքի շնորհիվ Ադրբեջանի ղեկավարությանը պետք է դնել այնպիսի կացության մեջ, որ հրադադարի պայմաններում մարդ սպանելու հրամանները Բաքվի համար ունենան խիստ բացասական քաղաքական հետևանքներ:
