2011թ. հունիսի 28-30-ը Երևանի պետական բժշկական համալսարանում (ԵՊԲՀ) տեղի կունենա Պլաստիկ վերականգնողական և էսթետիկ վիրաբույժների հայկական ասոցիացիայի (AAPRAS) 3-րդ միջազգային համաժողովը՝ «Անցանկալի ելքերը և բարդությունները պլաստիկ վիրաբուժության մեջ» թեմայով: Համաժողովի կազմակերպիչներն են՝ AAPRAS-ը և ԵՊԲՀ-ն:
Համաժողովն անցկացվում է Պլաստիկ վիրաբույժների միջազգային համադաշնության (IPRAS), Եվրոպայի պլաստիկ վիրաբույժների համադաշնության (ESPRAS) և Էսթետիկ վիրաբույժների միջազգային ասոցիացիայի հովանու ներքո:
Համաժողովի նպատակը աշխարհի այլ երկրների պլաստիկ վիրաբույժների հետ գործնական կապերի հաստատման, տեղեկատվության և փորձի փոխանակման միջոցով Հայաստանում պլաստիկ վիրաբուժության որակի և բուժման արդյունքի բարելավումն է:
Համաժողովի աշխատանքներին կմասնակցեն աշխարհի 20 երկրների 150 պլաստիկ վիրաբույժներ: Նախատեսվում են միջազգային փորձագետների 6 դասախոսություններ, 7 սեկցիաներում ընթերցվելիք շուրջ 60 զեկուցումներ, ինչպես նաև 10 կլոր սեղան, որոնցում բացի նեղ մասնագիտական թեմաներից կքննարկվեն նաև Եվրոպայում ու Ամերիկայում մասնագիտական կրթության, պլաստիկ վիրաբույժների կողմից իրականացվող հումանիտար առաքելությանը վերաբերող հարցեր: Համաժողովի նյութերը՝ շուրջ 90 աշխատանք, կամփոփվեն տպագիր ժողովածուի մեջ:
Համաժողովի բացումը տեղի կունենա հունիսի 28-ին, ժամը 10.00-ին, Երևանի պետական բժշկական համալսարանի նիստերի դահլիճում: Ողջույնի ուղերձներով հանդես կգան ՀՀ առողջապահության նախարար Հ. Քուշկյանը, ԵՊԲՀ ռեկտոր Դ.Դումանյանը, IPRAS-ի նախագահ Մարիտա Էլզենման-Կլեյնը (Գերմանիա) և (ESPRAS)-ի նախագահ Անդրեաս Յակոմետիսը (Հունաստան): Համաժողովի բացմանը կհաջորդի մամլո ասուլիս:
Համաժողովի շրջանակներում՝ հունիսի 30-ին ժամը 17.00-ին, կկազմակերպվի Հանրային օր (Public day), որտեղ կներկայացվեն հետևյալ թեմաները. կրծքագեղձի մեծացումն ի հաշիվ օրգանիզմի ճարպային ավելցուկների, կրծքագեղձի վերականգնումն օնկոլոգիական վիրահատությունից հետո, լիպոսակցիա՝ որքանո±վ է այն անվտանգ, դեմքի փոխպատվաստում, ցողունային բջիջներ և երիտասարդացում: Միջազգային փորձագետները հընթացս կպատասխանեն ներկաներին հետաքրքրող հարցերին: Հանրային օրվան մասնակցել ցանկացողների մուտքն ազատ է:
Պլաստիկ վերականգնողական և էսթետիկ վիրաբույժների հայկական ասոցիացիան հասարակական կազմակերպություն է, որը գործում է 2005 թվականից և միավորում է ավելի քան 50 պլաստիկ վիրաբույժների:
