Ադրբեջանական APA լրատվական գործակալության փոխանցմամբ՝ ԱՄՆ-ի թուրքական և ադրբեջանական համայնքները նամակ են հղել ԱՄՆ նախագահ Բարաք Օբամային, փոխնախագահ Ջոզեֆ Բայդենին և պետքարտուղար Հիլարի Քլինթոնին։
Նամակում ցանկություն է հայտնվում, որ ամերիկյան պաշտոնյաները չգործածեն «Լեռնային Ղարաբաղի բնակչություն» եզրույթը։
Նամակում ուշադրություն է հատկացվում այն բանին, որ հունիսի 23-ին Սպիտակ տան մամլո քարտուղարը նշել էր, թե Ադրբեջանի և Հայաստանի նախագահների հետ հեռախոսազրույցների ժամանակ նախագահ Օբաման գործածել էր այդ արտահայտությունը, ինչը «հակասում» է պետդեպարտամենտի քաղաքականությանը, ՄԱԿ ԱԽ-ի բանաձևերին, ինչպես նաև ԵԱՀԿ-ի դիրքորոշմանը։
Նամակի հեղինակները հիշեցնում են, որ Լեռնային Ղարաբաղում «բնակվում է» երկու ժողովուրդ՝ հայերն ու ադրբեջանցիները. «Նրանք ասում են Ղարաբաղի բնակչություն, սակայն այդպիսի հասկացություն «գոյություն չունի»։ Լեռնային Ղարաբաղում առկա է 120,000-անոց հայ համայնք և «40,000-անոց ադրբեջանական համայնք»։ Բացի այդ, կան նաև Ղարաբաղից վտարված 600,000 ադրբեջանցիներ»։
