Վճռաբեկ դատարանը նոյեմբերի 15-ին կայացված որոշումով բեկանել է Ռոբերտ Քոչարյանի կալանավորման մասին առաջին ատյանի դատարանի որոշումը չեղարկելու վերաբերյալ Վերաքննիչ դատարանի կայացրած վճիռը: Բեկանված վճիռը ուղարկվել է հետ՝ Վերաքննիչ դատարան, նոր քննության և վճռի համար: Ինչպես հայտնի է, Մարտի 1-ի գործով Ռոբերտ Քոչարյանին մեղադրանքից հետո ՀՔԾ-ն նրան կալանավորելու միջնորդություն էր ներկայացրել առաջին ատյանի դատարան, որը բավարարվել էր: Մոտ երկու շաբաթ կալանքի տակ մնալուց հետո Ռոբերտ Քոչարյանն ազատ արձակվեց՝ Վերաքննիչ դատարանի որոշումով, որը համարել էր, որ Ռոբերտ Քոչարյանին ներկայացված մեղադրանքը վերաբերում է նրա սահմանադրական լիազորությունների շրջանակում նախատեսված գործողության և, ըստ այդմ, Քոչարյանի վրա տարածվում է անձեռնմխելիության սահմանադրական նորմը, որպես էքս նախագահ:
Եվ ահա, այժմ Վճռաբեկ դատարանը բեկանում է այդ վճիռն ու գործը ուղարկում հետ, լրացուցիչ քննության: Ի՞նչ կորոշի Վերաքննիչ դատարանն այս անգամ: Հատկանշական է, սակայն, որ Վճռաբեկի այդ որոշումը զուգորդվում է Հայաստանում խորհրդարանի արտահերթ ընտրության նախընտրական շրջանին: Ռոբերտ Քոչարյանը չի մասնակցում ընտրությանը: Նա հայտարարել է նոր կուսակցություն ստեղծելու մտադրության մասին, սակայն նշել, որ ուղղակի չի հասցնի մասնակցել դեկտեմբերի ընտրությանը: Մյուս կողմից, սակայն, որևէ կերպ չէր կարելի բացառել Քոչարյանի «ստվերային» մասնակցության հնարավորությունը, թե որևէ քաղաքական ուժի, այսպես ասած, քողի ներքո, որն այս կամ այն կերպ առնչություն ունի նախորդ իշխող համակարգին, և թե գուցե տարբեր հանրային շրջանակներում իր ունեցած ազդեցությամբ:
Ընդ որում՝ տեսականում անշուշտ պետք չէր բացառել և այն, որ Քոչարյանը կարող էր իր ունեցած որոշակի կապերն օգտագործել պարզապես նախընտրական գործընթացում նոր իշխանության համար հավելյալ խնդիրներ ստեղծելու ուղղությամբ: Իհարկե, այս ամենը կարող է լինել զուտ հիպոթետիկ վտանգի դիտարկում, և երկրորդ նախագահը գուցե որևէ կերպ նաև որևէ ստվերային առնչություն չունենար նախընտրական գործընթացին: Սակայն բոլոր դեպքերում Վճռաբեկ դատարանի որոշումը, կամա թե ակամա, ըստ էության դառնում է կանխարգելիչ քայլ հնարավոր, թեկուզ տեսական ռիսկերի առնչությամբ, որով Ռոբերտ Քոչարյանը նախընտրական շրջանին ընդառաջ փաստորեն պահվում է, այսպես ասած՝ վերահսկողական հովանոցի ներքո, վերցվում, պայմանական ասած, դատական վերահսկողության տակ՝ եթե իհարկե նրա համար նշանակություն ունի, թե ինչ որոշում կարող է կայացվել Վերաքննիչ դատարանում այս անգամ, կամ որ այս անգամ կարող է կայացվել կալանավորումը հիմնավորող որոշում: