Արաբական մամուլը նշում է, որ Լիբանանում Իրանի նախագահը հանդես եկավ երկու կերպարով` բոցաշունչ ելույթներով հանրահավաքի ժամանակ եւ հավասարակշռված ելույթներով պաշտոնական հանդիպումներին:
Քաթարի «Ալ-Ջազիրա» հեռուստաալիքի պաշտանական կայքը նշում է, որ այն հանրահավաքը, որին մասնակցեց Ահմադինեժադը, կազմակերպվել էր ոչ թե պետության, այլ շիական Հիզբոլլահ եւ Ամալ կազմակերպությունների կողմից: Իսկ Լիբանանի պետական պաշտոնյաների հետ հանդիպումներում Իրանի նախագահն ընդհանրապես չէր խոսում Հիզբալլահի մասին, այլ երկկողմ համագործակցության, սիոնիստական հակառակորդի դեմ պայքարի: Ստորագրեց 17 պայմանագիր` տնտեսական համագործակցության վերաբերյալ, որոնցում, ինչպես նշում է սաուդյան «Ալ-Հայաթ» թերթը, խոսք չկար լիբանանյան բանակին աջակցություն ցուցաբերելու մասին: Թերթը ենթադրում է, որ Ահմադինեժադի զուսպ պահվածքի վրա իր ազդեցությունն է ունեցել Սիրիայի նախագահ Բաշար Ալ-Ասադը, ինչպես նաեւ Սաուդյան Արաբիայի եւ Հորդանանի թագավորները, ում աջակցությունը Լիբանան գնալուց առաջ ստացել էր Ահմադինեժադը եւ ի մասին հայտարարեց Բեյրութում:
Ըստ լիբանանյան Daily Star թերթի՝ Ահմադինեժադի այցելությունը Լիբանան Արեւմուտքի կողմից գերագնահատվում է: Բեյրութի ամերիկյան համալսարանի փորձագետ Հիլալ Խաշանի գնահատականով, այս այցելությունն ունեցել է ավելի շատ սիմվոլիկ, քան ռեալ նշանակություն, քանի որ նրա այցից հետո ամեն ինչ կվերադառնա ի շրջանս յուր, իսկ նրա այցելությունը մեծ ազդեցություն չի ունենա, քանի որ խնդիրները Լիբանանում ավելի խորն են: Թերթը կոչ է անում ավելի մեծ ուշադրություն դարձնել ոչ թե Հիզբալլահի բարձրացրած աղմուկին, այլ իշխող կոալիցիայի հայտարարություններին, որոնցով խորհրդարանականներն իրենց մտահոգությունն են հայտնել Ահմադինեժադի այցի կապակցությամբ, որը փորձում է Լիբանանը վերածել Իրանի միջերկրածովյան ռազմական բազայի: