Թուրքիայում Հայոց գանձերի որոնման մարզը այնքան զարգացած է, որ սկսել են Youtube-ի միջոցով գանձագողության դասեր տալ սկսնակներին:
Ֆրանսիական «Յառաջ» պարբերականի փոխանցմամբ՝ թուրքական «Թարաֆ» թերթը տեղեկացրել է, որ գանձագողության այս հատուկ ուղեցույց-տեսահոլովակները դիտել են ավելի քան 10 հազար մարդ:
«Հայի տունը գաղտնի գանձարան է» վերտառությամբ տեսահոլովակի հեղինակը պատմում է, որ մինչև Ցեղասպանությունը հայերն իրենց թանկարժեք իրերը և զարդերը պահում էին տան հատուկ պահոցներում կամ պարտեզներում:
«Ցեղասպանությունից հետո որոշ հայեր հաջողել են ետ գալ և իրենց գանձերը տանել կամ դիմել են Պատրիարքարանին, որի միջոցով ստացել են իրենց թանկարժեք իրերը և զարդերը: Այնուամենայնիվ, դեռ շատ հայերի տներում պահպանվում են այդ գանձերը: Հայոց գանձերը գտնելու համար երբեք մի ապավինեք քարտեզների կամ նշանների: Հայերը երբեք դրանք քարտեզների մեջ չեն նշել, ոչ էլ նշաններ են դրել: Հայոց գանձերը փնտրեք տներում և պարտեզներում»,- ասում է հեղինակը: