Նախօրեին հրավիրած ասուլիսի ժամանակ Պաշտպանության նախարարի պաշտոնակատար Դավիթ Տոնոյանը հայտարարեց, որ Հայաստանի օդուժի համար նոր կործանիչների ընտրությունն արդեն կատարվել է. «Ընտրությունը արդեն իսկ կատարված է, լուծվում են որոշ ֆինանսատեխնիկական խնդիրներ»: Հարցին, թե արդյոք խոսքը ռուսական Սու-30-ի մասին է, ռազմական գերատեսչության ղեկավարը հստակ պատասխան չտալով՝ չհերքեց, որ խոսքը նաև դրա մասին է: Թեմայի շուրջ «Առաջին լրատվական»- ի հետ զրույցում իրենց դիտարկումները ներկայացրին ռազմական փորձագետ Մհեր Հակոբյանը և «Ողջ մնալու արվեստ» կազմակերպության ղեկավար, հետախույզ Վովա Վարդանովը:
«Եթե խոսքը վերաբերեր շվեդական JAS-39 Gripen ինքնաթիռին, դա կործանիչ-հետախույզ է, բայց պարոն Տոնոյանը հայտարարեց, որ ընտրված է Սու-30-ը: Այն ինքնաթիռ է, որը կարող է լինել և՛ կործանիչ, և՛ ստացած ինֆորմացիան կարող է հաղորդել մյուս ինքնաթիռներին, և՛ կարող է լինել հետախույզ, նաև կարող է խոցել ցամաքային թիրախներ. այսինքն՝ բազմաֆունկցիոնալ կործանիչ է. ունի ոչ միայն «աչքեր», այլ նաև «բռունցքներ», որոնցով կարող է հարվածել ցամաքային թիրախներին»,- նշեց Վովա Վարդանովը: Նա նաև ընդգծեց, որ Սու-30-ն ակտիվ պաշտպանության, ինչպես նաև մարտավարական լայն ճկունության հնարավորություն է տալիս:
«Կործանիչների ձեռքբերման մասին հայտարարությունն ուրախալի լուր է,- նշեց Մհեր Հակոբյանը: – Հայ ժողովրդի գոյության միակ երաշխիքը հայկական բանակն է, իսկ հայկական բանակն ինչքան հզոր լինի, այնքան ժողովուրդն ապահով կլինի: Կործանիչ ավիացիայի ի հայտ գալը ՀՀ Զինված ուժերում, հայկական ԶՈւ-ն բարձրացնում է զարգացման մի նոր, հիանալի մակարդակի. այն կմեծացնի հայկական բանակի մարտունակությունը»:
Մանրամասն՝ տեսանյութում:
