Այսօր պաշտոնապես հայտարարվել է, որ «Սասնա ծռեր» կուսակցությունը մասնակցելու է առաջիկա արտահերթ խորհրդարանական ընտրություններին: «Նոր դեմքեր կան, մեր ցուցակում ընդգրկված են ոչ միայն «Սասնա ծռեր» կուսակցության, այլ նաև այլ կուսակցությունների անդամներ և անկուսակցականներ: Ցուցակում ընդգրկված են նրանք, ովքեր համախոհ են մեզ հետ: Այս մասին «Առաջին լրատվական»- ի հետ զրույցում ասաց «Սասնա ծռեր» կուսակցության քարտուղարության անդամ Գարեգին Չուգասզյանը:
Նրա դիտարկմամբ՝ գործող Ընտրական օրենսգրքի պատճառով ձևավորվելիք խորհրդարանը կլինի ժամանակավոր: «Նման օրենքներով քաղաքական ընտրություն կատարելը մասամբ է հնարավոր: Ռեյտինգային համակարգը ստիպում է խնամի-ծանոթ-բարեկամի միջոցով և ոչ թե քաղաքական պատկերացումների հիման վրա ընտրվել… Այդ առումով մենք չենք կարող համեմատվել այն թալանչիների հետ, որոնք տարիներ շարունակ ստեղծել են օլիգարխիկ համակարգ, սակայն վստահ ենք, որ մեր ժողովուրդը կշարժվի մեր ժամանակի փոփոխված սկզբունքով, և իր քվեն չի տա օլիգարխիկ ուժերին»,- նշեց Չուգասզյանը՝ նկատի ունենալով ՀՀԿ-ին և ԲՀԿ-ին:
«Մենք հանրային քաղաքականության կուսակցություն ենք, մեր գաղափարները մտածել ենք տարիներ շարունակ: Վաղուց ենք մշակել մեր ծրագիրը, թե ինչպիսին պետք է լինի մեր պետությունը առանց Սերժ Սարգսյանի»,- նշեց Չուգասզյանը: Նրա կարծիքով՝ Հայաստանում պետք է լյուստրացիա արվի՝ թե՛ տնտեսական, թե՛ քաղաքական:
Անդրադառնալով դիտարկմանը, որ ՀՀԿ որոշ ներկայացուցիչների կարծիքով՝ իշխանությունների կողմից կոռուպցիայի դեմ պայքարը ցուցադրական է, Գ. Չուգասզյանը նշեց. «ՀՀԿ-ի կողմից որևէ լուրջ բան երբեք չի ասվել, հիմա էլ ավելի անլուրջ է դառնում, կարելի է ասել այնկողմնային աշխարհից փորձում են խոսել և վերակենդանացման նշաններ են ցույց տալիս, բայց դա նրանց չի հաջողվելու»:
«Երբ որ անցում է կատարվում ժողովրդավարության, զենքի կարիք չի լինում: Եթե Հայաստանում նորից լինի բռնակալություն, ինքնապաշտպանության իրավունքն է առաջանալու»,- ընդգծեց Գ. Չուգասզյանը՝ հավելելով, որ ապստամբությունը ժողովրդի իրավունքն է:
Մանրամասն՝ տեսանյութում: