«Առաջին լրատվական»-ի զրուցակիցն է վարչապետի աշխատակազմի ղեկավար Էդուարդ Աղաջանյանը:
–Նախ ուզում եմ հարցնել՝ «Իմ քայլը» դաշինքի համար էակա՞ն է, թե ովքեր կլինեն այս ընտրությունների մասնակիցները:
-«Իմ քայլը» դաշինքի համար նախընտրելի կլիներ, եթե մենք ընտրությունների գնայինք մեր իսկ առաջարկած Ընտրական օրենսգրքով, որի պարագայում ԱԺ-ում կապահովվեր ավելի բարձր մակարդակի բազմազանություն: Մեր առաջարկով ԱԺ-ում ներկայացված կլիներ առնվազն 4 քաղաքական ուժ: Ցանկալի կլիներ, որ այն ուժերը, որոնք ներկայացված կլինեն ԱԺ-ում, լինեին քաղաքական այնպիսի անցյալ ունեցող ուժեր, որոնք հանրության ընկալման մեջ մնացել են որպես հանրության շահերը պաշտպանող ուժեր՝ ամեն մեկն իր գաղափարական հենքի շրջանակներում: Մանրամասնեմ. քննարկվում է ՀՀԿ-ի մասնակցության նպատակահարմարությունը, կարծիքներ կան, որ դա կառողջացնի ԱԺ-ն այն տեսանկյունից, որ միակուսակցություն չի լինի, ընդդիմադիր բևեռը իշխանության եկած ուժին կստիպի հաշվի նստել իր կարծիքի հետ և սթափ լինել: Այս տեսակետը իրավունք ունի գոյություն ունենալ, բայց իմ կարծիքով՝ ՀՀԿ-ն, եթե քաղաքական գործունեություն է ծավալել, ապա դա եղել է մինիմալ, ՀՀԿ-ն իր ամբողջ գործունեության ընթացքում քաղաքականությունը և քաղաքական ամբիոններն օգտագործել է որպես գործիք մի խումբ անձանց շահերի սպասարկման համար և ոչ ՀՀ քաղաքացիների համար, հետևաբար, նրանց գործունեությունը ձևակերպել որպես քաղաքական գործունեություն, փոքր-ինչ սխալ է:
-Ամեն դեպքում, դեմ չե՞ք լինի, որ ԱԺ-ում «Իմ քայլը» դաշինքի ընդդիմախոսը լինի ՀՀԿ-ն:
-Ո՛չ, դա իրենց իրավունքն է, որևէ մեկը ՀՀԿ-ին չի արգելել քաղաքական գործունեություն ծավալել ՀՀ-ում: Բոլոր հարցերի պատասխանները կտան ՀՀ քաղաքացիները, այդ թվում նաև կորոշեն ՀՀԿ-ի՝ ԱԺ-ում ներգրավվածության հարցը:
-ՀՀԿ-ն ակնհայտորեն ցույց է տալիս, որ հեղափոխական ուժին ավելի շահեկան ընդդիմադիր ուժ, քան ինքն է, չեն էլ պատկերացնում և բավականին պատկերավոր ակնարկներ են հնչեցնում. «Մենք հո չե՞նք թողնի, որ Նիկոլ Փաշինյանը տապալվի»: Ծանո՞թ է այս արտահայտությունը:
-Անկեղծ ասած, իմ պատկերացմամբ՝ ՀՀԿ-ն իդեալական ընդդիմություն կլինի մեր քաղաքական ուժի համար, որովհետև բոլոր այն արատավոր երևույթները, որոնք ժառանգել ենք, ՀՀԿ-ի երկար տարիների գործունեության արդյունքն է, հետևաբար, նրանք շատ թույլ կլինեն որպես ընդդիմախոս, բոլոր այն բացթողումները, որոնց մասին իրենք կխոսեն գոնե սկզբնական շրջանում, անուղղակիորեն պտտվելու են իրենց դեմ: Մենք պետք է ցանկանանք ավելի ուժեղ ընդդիմություն մեզ համար, որը կձևավորվի գաղափարական տարաձայնությունների շրջանակներում և ոչ անձնական ու ռևանշիզմի տրամաբանությամբ:
–Դրա հնարավորությունը կլիներ, եթե նոր ԸՕ-ով գնայինք ընտրությունների, բայց գնում ենք գործող ԸՕ-ով. շատ վերլուծաբաններ կարծում են, որ դա բխում է և ՀՀԿ-ի և ՔՊ-ի շահերից:
-Թույլ տվեք չհամաձայնվել: ՔՊ-ի շահերից չի բխում ներկայիս ԸՕ-ն, հակառակ դեպքում մենք չէին նախաձեռնի ԸՕ փոփոխությունները, որևէ հիմք չեմ տեսնում նման պնդումների համար: ԸՕ-ն բխում է ՀՀԿ-ի շահերից:
–Ամեն ինչ կախված է նրանից, թե ինչ նշաձող կսահմանվի այս կարճ ընտրարշավում, դրա բանալին ՔՊ-ի ձեռքին է՝ գնալ սև ու սպիտակի ճանապարհով, թե՞ կլինի բազմագույն, բազմաշերտ ընտրապայքար:
-Սև ու սպիտակի բաժանելու կարիք չկա, որովհետև հասարակությունը մի քանի անգամ ապացուցեց, որ ավելի քան ադեկվատ է և թացը չորից հստակ տարբերում է: Մենք պետք է շեշտը դնենք անելիքների, ծրագրերի վրա և ժամանակ տրամադրենք այլ քաղաքական ուժերին:
-Ռեյտինգային ցուցակների հետ կապված բարդություններ կա՞ն ՔՊ-ի համար. դժգոհություններ կան Գյումրիից, Սիսիանից, Ապարանից՝ կապված նրա հետ, թե ՔՊ-ից ով է առաջադրվելու…
-Կուսակցության ներսում ընդհանուր մթնոլորտը դրական է, գործնական և գործընկերային… Վստահեցնում եմ՝ ՔՊ-ի ներսում բարիդրացիական հարաբերություններ են բոլոր թեկնածուների միջև, և մենք այս թիմային տրամաբանությամբ պատրաստվում ենք շարժվել առաջ:
Հարցազրույցն ամբողջությամբ՝ տեսանյութում: