Ռուսաստանը ներկայացնող հայազգի թենիսիստ Կարեն Խաչանովը փառահեղ հաջողություն գրանցեց: ATP «Master 100» Փարիզի հեղինակավոր մրցաշարի եզրափակչում Խաչանովը հաղթող ճանաչվեց: Ընդ որում, եզրափակչում 22-ամյա Խաչանովը 7:5, 6:4 հաշվով առավելության հասավ համաշխարհային թենիսի լեգենդներից սերբ Նովակ Ջոկովիչի նկատմամբ:
Հայազգի թենիսիստը հայտնվել է միջազգային հեղինակավոր լրատվամիջոցների ուշադրության կենտրոնում: Նշվում է, որ Խաչանովը ֆենոմենալ երիտասարդ է, որը անհավանական կերպով ուղղակի ստիպեց հանձնվել լեգենդին: Ի դեպ, Կարեն Խաչանովն առաջին անգամ հաղթեց «Master» կարգի մրցաշարում:
Արդեն 10 տարի Ռուսաստանը ներկայացնող թենիսիստներին չէր հաջողվում հաղթել այս կարգի մրցաշարերում: Վերջին անգամ՝ 2009 թվականին, ռուսաստանցի Նիկոլայ Դավիդենկոյին էր հաջողվել հաղթել Շանհայում տեղի ունեցած «Master» կարգի մրցաշարում: Ըստ մասնագետների՝ հայազգի թենիսիստը Փարիզում ոչ թե բարձրակարգ կամ բալանսավորված, այլ ֆանտաստիկ խաղ է ցուցադրել: Այս տարի Խաչանովը համաշխարհային թենիսի թոփ-10-ը ներկայացնող ներկայացուցիչների հետ պայքարում 11 մրցավեճում 10 պարտություն էր կրել: Փարիզյան մրցաշարում մինչև եզրափակիչ հասնելը՝ նա պայքարից դուրս էր թողել լավագույն 3 թենիսիստների լավագույն տասնյակից՝ ամերիկացի Ջոն Ինզերին, Գերմանիան ներկայացնող Սաշա Զվերևին, ինչպես նաև ավստրիացի Դոմնիկ Տիմին:
2018 թվականը արդեն իսկ լավագույնն է 22-ամյա Խաչանովի համար: Մինչ «Master 100» -ը՝ նա արդեն երկու անգամ հաղթել էր ATP դասի մրցաշարերում: Մինչ այս Խաչանովին մեկ տարվա ընթացքում լավագույն դեպքում հաջողվել էր առաջին տեղը զբաղեցնել ընդամենը մեկ մրցաշարում: Բուքմեյքերները Խաչանով-Ջոկովիչ մրցավեճում բացահայտ ֆավորիտ էին համարում սերբ թենիսիստին: Վնասվածքից հետո շարք վերադառնալով՝ Ջոկովիչը շարունակել էր տպավորիչ մրցելույթներն ու արժանիորեն գլխավորեց ATP-ի դասակարգման աղյուսակը: Խաչանովի հետ հանդիպումից առաջ Ջոկովիչը 22 անընդմեջ հաղթանակ էր տարել: Ավելին, սերբ թենիսիստը երեք անգամ անընդմեջ հաղթել էր ATP-ի մրցաշարերում, որոնցից մեկը՝ Մեծ սաղավարտի ԱՄՆ բաց առաջնությունում:
Վերջին անգամ Խաչանովն ու Ջոկովիչը հանդիպել էին Մեծ սաղավարտի Ուիմբլդոնի մրցաշարի քառորդ եզրափակչում: Այս մրցավեճում Ջոկովիչն առանց դժվարության հաղթել էր 6:4, 6:2, 6:2 հաշվով: Հայ թենիսիստին հաղթելու դեպքում Ջոկովիչը 33-րդ անգամ կարիերայի ընթացքում առաջինը կլիներ «Master» կարգի մրցաշարում և, նոր ռեկորդ սահմանելով, կգերազանցեր իսպանացի Ռաֆայել Նադալին: Խաչանովն առաջին անգամ էր ելույթ ունենում նման մակարդակի մրցաշարի եզրափակչում և հանդիպման սկզբում ոչ այնքան վստահ էր գործում: Ջոկովիչը վստահորեն միավորներ էր վաստակում, և թվում էր, թե սերբ թենիսիստը հեշտ հաղթանակ կտանի: Հաղթահարելով լարվածությունը՝ Խաչանովը առաջին սեթի միջնամասում ֆանտաստիկ կերպով բեկեց պայքարի ընթացքը: Առաջին սեթում հաղթելուց հետո Խաչանովը էլ ավելի վստահ սկսեց գործեց և 2-րդ սեթի 3-րդ գեյմում հաղթեց մրցակցի մատուցման ժամանակ: Դրանից հետո Ջոկովիչը վերջնականապես կորցրեց խաղի թելը:
Սա Խաչանովի գլխավոր հաղթանակն էր կարիերայի ընթացքում, ինչի շնորհիվ համաշխարհային դասակարգման աղյուսակում բարձրացավ 11-րդ հորիզոնական: «Առաջին հերթին ցանկանում եմ շնորհավորել Նովակին ծանր վնասվածքից հետո փայլուն վերադարձի համար: Վաղը նա կգլխավորի դասակարգման աղյուսակը: Դու մեծ չեմպիոն ես: Ես միշտ հպարտացել եմ քո խաղով, ու հիմա քեզ հետ կորտում գտնվելն ուղղակի աննկարագրելի էմոցիաներ է պարգևել ինձ: Ի սրտե շնորհավորում եմ քեզ ու քո թիմին: Շնորհակալություն եմ հայտնում ընտանիքիս ու թիմին ծանր աշխատանքի համար: Մրցաշրջանը նման կերպով ավարտելն ուղղակի երազանք է շատ թենիսիստների համար: Հուսով եմ՝ հետագայում կկարողանամ ռեյտինգով շրջանցել Նովակին: Գիտեմ, որ դա շատ դժվար է, բայց ամեն դեպքում կփորձեմ դա անել»,- մրցավեճից հետո ասել է Կարեն Խաչանովը:
Վերջինս ծնվել է Մոսկվայում, նրա հայրը՝ Աբգար Խաչանովը, զբաղվել է վոլեյբոլով և աչքի ընկել բարձրակարգ խաղով: 2013 թվականին Խաչանովը հաղթող է ճանաչվել Եվրոպայի առաջնությունում՝ դառնալով ռուսական թենիսի գլխավոր հայտնություններից մեկը: Հայազգի թենիսիստը Ռուսաստանի ամենաերիտասարդ ներկայացուցիչն է, որը հանդես է եկել ATP դասի մրցաշարերում: Մասնավորապես, 17 տարեկան և 157 օրականում Խաչանովը նորամուտն է նշել նման մակարդակի մրցաշարերում: 2016 թվականին Խաչանովն առաջին անգամ հաղթել է ATP մրցաշարում:
Այսօր արդեն հայ թենիսիստը մոտ է աշխարհի լավագույն թենիսիստների լավագույն տասնյակում ընդգրկվելուն: Փորձագետները վստահ են, որ այս ոգով շարունակելու դեպքում եկող տարի Խաչանովը կարող է դառնալ համաշխարհային թենիսի գլխավոր ֆիգուրներից մեկը: