Հունգարիայում ավարտված ըմբշամարտի աշխարհի առաջնությունում Հայաստանի ազատ և հունահռոմեական ոճի հավաքականներն այնքան էլ հաջող ելույթ չունեցան: Մեր ազատ ոճայիններն ընդհանրապես մեդալ չնվաճեցին, իսկ հունահռոմեական ոճի հավաքականին հաջողվեց վաստակել երկու բրոնզե մեդալ: Սպասելիքները հատկապես մեծ էին աշխարհի և օլիմպիական չեմպիոն Արթուր Ալեքսանյանից և աշխարհի չեմպիոն Մաքսիմ Մանուկյանից: Վերջինս բավարարվեց երրորդ տեղով ինչը ևս վատ արդյունք համարել չի կարելի:
Արթուր Ալեքսանյանն էլ կիսաեզրափակչում կրած պարտությունից հետո չներկայացավ բրոնզե մեդալի համար գոտեմարտից: Այս առաջնությունում նշանավորված դրվագներից դարձավ 87 քաշային կարգում բրոնզե մեդալի համար գոտեմարտը: Հիշեցնենք, որ մեր ըմբիշներից Արթուր Շահինյանը սփոփիչ գոտեմարտերում հաղթելուց հետո տեղի համար մրցել էր Ադրբեջանը ներկայացնող Իսլամ Աբասովի հետ: Շահինյանը փայլուն գոտեմարտ էր անցկացրել և հաղթել 6:1 հաշվով: Գոտեմարտի վերջում ադրբեջանցի ըմբիշը զայրույթից ոռնացել և լաց էր եղել: Աբասովի պահվածքը զայրույթի ալիք է բարձրացրել հարևան երկրում ինչի հետևանքով էլ այս ըմբիշը հայտնվել է հոգեբանական ծանր վիճակում: Մասնավորապես, ադրբեջանցիները չեն կարողանում հասկանալ, թե ինչպես կարելի էր հայ մրցակցին պարտվելուց հետո լաց լինել: Ոմանք այս ըմբիշին հորդորում են ավարտել կարիերան կամ գոտեմարտել այն երկրի դրոշի ներքո:
«Տարբեր մրցաշարերում հաճախ են միմյանց հետ մրցում հայ և ադրբեջանցի ըմբիշները: Հունգարիայում տեղի ունեցած մրցաշարը բացառություն չէր: Որոշ դեպքերում հաղթում ենք մենք, որոշ դեպքերում էլ՝ ցավոք սրտի հայերը: Սա սպորտ է և հնարավոր չէ շարունակ հաղթել սկզբունքային մրցակիցներին: Աբասովը գիտակցելով, որ մրցակիցը թշնամի երկրի ներկայացուցիչ է՝ դարձավ էմոցիաների զոհը: Նյարդային ջղաձգումների արդյունքում նա ուղղակի կոտրվեց: Կարելի է հասկանալ Աբասովին, բայց գորգի վրա արցունքներ արձակելը ուղղակի անընդունելի էր: Նա հայ մրցակցի և թշնամի ժողովրդի առաջ ցույց տվեց իր թուլությունը: Կարելի էր պարտվել և տղամարդուն վայել պահվածքով շնորհավորել Շահինյանին: Այսօր հայկական լրատվամիջոցները գրում են, որ Շահինյանը լացացրեց ադրբեջանցի մրցակցին: Ցավոք դա այդպես է: Հունգարիայում հնչեց Ադրբեջանի օրհներգը, վեր բարձրացավ մեր երկրի դրոշը, սակայն Աբասովի պահվածքը ստվեր գցեց մեր հաջողությունների վրա: Կարելի էր լաց լինել հանդերձարանում կամ որևէ այլ վայրում, բայց ոչ գորգի վրա, ամբողջ աշխարհի աչքի առաջ: Ամեն դեպքում պետք չէ հրաժարվել այս ըմբիշից: Այո, նա ցավալի արարք է թույլ տվել, բայց պետք է հնարավորություն տալ Աբասովին շտկելու իրավիճակը: Պատկերացրեք թե նա մյուս առաջնություններում ինչպիսի վճռականությամբ կգոտեմատի հայերի դեմ: Աբասովը «վիրավոր գազան է», որը շուտով կարող է բարձունքներ նվաճել: Պետք է քաջալերենք Իսլամին և պատրաստվենք վրեժի մենամարտին»,- ասել է ադրբեջանցի բլոգեր Ռամիս Սուլթանովը:
Շահինյան-Աբասով գոտեմարտին ստիպված է եղել անդրադառնալ նաև հունահռոմեական ոճի ըմբշամարտի Ադրբեջանի ազգային հավաքականի գլխավոր մարզիչ Շաբան Դոնաթը: Վերջինս հայտարարել է, որ Աբասովի լաց լինելու պատճառն ամենևին էլ հայ մրցակցից կրած պարտությունը չէ: «Կիսաեզրափակչում կրած պարտությունից հետո Իսլամն ընկճվեց: Ժամանակ չունեինք նրան հոգեբանորեն վերականգնելու համար: Աբասովը երիտասարդ է և չկարողացավ տրամադրվել Շահինյանի հետ գոտեմարտին: Պարտությունից հետո նրա նյարդերը վերջնականապես տեղի տվեցին: Պատճառն այն չէ, որ մեր ըմբիշը պարտվեց Հայաստանի ներկայացուցիչին: Աբասովը երազում էր մեծ հաղթանակ տաներ եզրափակիչ գոտեմարտում: Նպատակին չհասնելու դեպքում շատերի մոտ կարող է նյարդային պոռթկումներ տեղի ունենալ: Ամենայն պատասխանատվությամբ հայտարարում եմ, որ Աբասովը մեր հավաքականի ամենահեռանկարային ըմբիշներից է:
Կարծում եմ ճիշտ չէ նրան նախատելն ու քննադատելը: Այս առաջնությունում Աբասովը առավելության հասավ իր գլխավոր մրցակիցների նկատմամբ: Եթե չլիներ հոգեբանական գործոնը նա անպայման մեդալով կվերադառնար Բաքու: Եկեք Աբասովին հանգիստ թողնենք և ժամանակ տանք վերականգնվելու համար: Վստահ եմ, որ մոտ ապագայում նա մեծ հաղթանակներ կտանի թե աշխարհի առաջնությունում և թե Օլիմիպական խաղերում»,- ասել է Դոնաթը: Թեև ադրբեջանցի լրատվամիջոցները փորձում են հասարակությանը շեղել Աբասով-Շահինյան գոտեմարից, այդուհանդերձ հարևան երկրի համար Հունգարիայում տեղի ունեցած աշխարհի առաջնությունը նշանավորվեց որպես լացի մրցաշար: Նշենք, որ Ադրբեջանի երկու հավաքականներն էլ ընդհանուր առմամբ Հայաստանի հավաքականներից ավելի հաջող ելույթ ունեցան: Այս փաստը սակայն ամենևին էլ չի գոհացնում մեր հարևաններին:
Հավանաբար ադրբեջանցիները կնախընտրեին, որ իրենց ըմբիշները ձախողվեին Հունգարիայում միայն թե չլիներ Աբասովի լացը Շահինյանի հետ գոտեմարտից հետո: