ԵՄ կողմից «Արևելյան գործընկերության» երկրների համար արտոնագրային ռեժիմի վերացումը հնարավոր է միայն այդ երկրներում անվտանգության եվրոպական չափանիշների արդյունավետ ներդրման պայմանով: Այդ մասին Բեռլինում հայտնել է ԵՄ ընդլայնման ու Եվրոպական հարևանության քաղաքականության հարցերով եվրահանձնակատար Շտեֆան Ֆյուլեն` բացելով Քաղաքացիական հասարակության երկրորդ եվրոպական ֆորումը (Civil Society forum): Ինչպես հաղորդում է Ուկրինֆորմը, եվրահանձնակատարն «արտակարգ կարևոր» է անվանել ԵՄ ու «Արևելյան գործընկերության» մասնակից երկրների` Հայաստանի, Ադրբեջանի, Բելառուսի, Վրաստանի, Մոլդովայի և Ուկրաինայի քաղաքացիների միջև սոցիալական հաղորդակցությունը: «Ես հավատում եմ, որ մենք աստիճանաբար կկարողանանք վերացնել արգելքները Եվրոպայում մարդկանց ազատ տեղաշարժման համար, բայց դրա համար մեր արևելյան գործընկերները պետք է իրենց երկրներում անվտանգության հսկողության պատշաճ մակարդակ ապահովեն»,- ընդգծել է Շտեֆան Ֆյուլեն: Նա նշել է նաև քաղաքացիական հասարակության առանձնակի դերը, որը պետք է հանդես գա որպես Եվրոպայում արտոնագրային ռեժիմի վերացման փաստաբան:
Ֆորումին մասնակցել են 230 հասարակական կազմակերպություններ Եվրամիության անդամ պետություններից ու Արևելյան գործընկերության երկրներից: Միջոցառման ընդհանուր նպատակը կայանում է քաղաքացիական հասարակության կազմակերպությունների միջև հաղորդակցության զարգացման և պետական իշխանության մարմինների հետ նրանց երկխոսությանն աջակցելու մեջ: Երկօրյա խորհրդաժողովի մասնակիցները քննարկում են քաղաքական և տնտեսական իրադրությունը Արևելյան գործընկերության երկրներում, խնդիրները սոցիալական ոլորտներում, էներգախնայող տեխնոլոգիաների ներդրման, կլիմայի հսկողության, կոռուպցիայի դեմ պայքարի, խոսքի ազատության ապահովման հետ կապված իրադրությունը և այլն: Ծրագրվում է նաև ամփոփել ձեռքբերումները, որոնք հաջողվել է կյանքի կոչել 2009 թվականի նոյեմբերին առաջին Ֆորումի անցկացման պահից ի վեր:
