Լուրեր
Ռեյտինգայինը համարվում է «գագասիկի» ընտրություն. Արամ Սարգսյան
  • 14:58
  • 2018-10-22
  • Դիտումներ՝ *

Այսօր՝ հոկտեմբերի 22-ին, ԱԺ-ում հրավիրվել է արտահերթ նիստ: Օրակարգում Ընտրական օրենսգրքում փոփոխություններ կատարելու հարցն է:

«Պարոն Զեյնալյանը միշտ ներկայացնում է շատ կոնկրետ և սպառիչ, և դրա համար ներկայացված օրենքին միանշանակ ասում եմ՝ այո»,- հայտարարեց «Ելք» խմբակցության պատգամավոր Արամ Սարգսյանը՝ հավելելով, որ հանրային ընկալման մեջ ռեյտինգային ընտրակարգը համարվում է վատը. «Իմ ընկեր Մարուքյանի խոսքով ասած՝ համարվում է «գագասիկի» ընտրություն: Ժողովուրդն այդպես է ընկալել, որ դա թաղային հեղինակության ընտրություն է: Իհարկե, կան մարդիկ, որոնք տեղերում հեղինակություն ունեն և ռեյտինգային համակարգով իրենց հեղինակությամբ են քվե վերցրել»,- ասաց Արամ Սարգսյանը:

Նրա խոսքով՝ թե՛ ՀՀԿ-ն, թե՛ ԲՀԿ-ն, թե՛ ՀՅԴ-ն և թե՛, բնականաբար, «Ելք»-ը կողմ են արտահայտվել դեկտեմբերին կայանալիք արտահերթ խորհրդարանական ընտրություններին. «Դա թեմայից դուրս է. ամբողջ խնդիրն այն է, թե ինչպիսի ընտրություն պետք է կատարենք դեկտեմբերին, ինչ ԸՕ-ով»:

Նա հարց է բարձրացնում՝ ի՞նչ են շահելու այն ուժերը, որոնք ցանկանում են ընտրություններն անցկացնել հին ԸՕ-ով:

«ՀՀԿ-ի վերին շարքում նստած 3 մարդ ավելի շատ քվե էին վերցրել տեղերում, քան «Ելք» դաշինքը ամբողջությամբ, ու նման վարկանիշային ընտրությունը դուք համարում եք բնակա՞ն»,- ռեյտինգային ընտրակարգին անդրադառնալով՝ ասաց Արամ Սարգսյանը և հավելեց՝ այդ մարդիկ աշխատատեղ կարող են ստեղծել առանց ընտրվելու, որովհետև այդ մարդիկ ընտրվելուց հետո ԱԺ ամբիոնից չեն օգտվել:

Արամ Սարգսյանը հավելեց, որ այդ վերին շարքում նստած մարդիկ այստեղ իզուր ժամավաճառությամբ են զբաղվում, իսկ նրանց համար «ժամանակը փող է»:

 

Մանրամասները՝ տեսանյութում:

  • Դիտումներ՝ *