Հայաստանի ԱԳՆ-ի կայքի հաղորդմամբ՝ Հայաստանի արտգործնախարար Էդուարդ Նալբանդյանը ամփոփել է երեկ Կազանում կայացած Սարգսյան-Ալիև-Մեդվեդև եռակողմ հանդիպման արդյունքները.
«Հանրապետության նախագահը Ստրասբուրգում հայտարարել էր, որ կարելի է Կազանում ակնկալել դրական արդյունքներ, առաջընթաց, եթե Ադրբեջանը նոր փոփոխություններ չառաջարկի:
Սակայն, Կազանը բեկումնային չեղավ, որովհետև Ադրբեջանը պատրաստ չեղավ ընդունել եռանախագահների կողմից առաջարկված հիմնարար սկզբունքների վերջին տարբերակը:
Դովիլում եռանախագահող երկրները կոչ էին արել նախագահներին համաձայնության գալ Կազանում: Նախագահների հետ հեռախոսազրույցներում նախագահ Օբաման էր նույն կոչն արել: Նաև Ֆրանսիայի նախագահ Սարկոզին էր ուղերձներ հղել նախագահներն:
Սակայն ադրբեջանական կողմը մոտ մեկ տասնյակ փոփոխություններ առաջարկեց և դա էր պատճառը, որ Կազանի հանդիպումը բեկումնային չեղավ:
Ամեն դեպքում, հանդիպումը, կարծում եմ, օգտակար էր այն իմաստով, որ շարունակվեցին մանրամասն քննարկումները: Եվ կարևորն այն է, որ նախագահ Մեդվեդևը, որը վերջին երեք տարվա ընթացքում մեծ ներդրում է ունեցել այս գործընթացում, իր պատրաստակամությունը հայտնեց շարունակել ջանքերը՝ սկզբունքների համաձայնեցման և դրանց շուրջ վերջնական համաձայնություն ձեռք բերելու համար:
Կողմերի միջև վերջին երեք տարիների ընթացքում սա արդեն 12-րդ հանդիպումն էր: Բայց վերջին մեկ տարվա ընթացքում, այս սցենարը, երբ Ադրբեջանը, փաստորեն, նոր փոփոխություններով և առաջարկներով է հանդես գալիս, արդեն առնվազն չորրորդ անգամ է կրկնվում: Սա է իրականությունը:
Բայց շարունակելու ենք բանակցությունները, որովհետև կարգավորման համար այլ ճանապարհ չկա: Միայն խաղաղ ճանապարհով, բանակցությունների միջոցով է հնարավոր լուծել հիմնախնդիրը»: