«Պաշտոնական մակարդակով մեր կուսակցությունը, հուղարկավորության հանձնաժողովը և անձամբ ես այդ հարցին ընդհանրապես չենք անդրադարձել, իսկ ինչ վերաբերում է սոցցանցերում դրա վերաբերյալ առկա գրառումներին, ապա տարբեր քաղաքացիներ իրենց կարծիքն են արտահայտել, և տվյալ պարագայում դա մեր պաշտոնական տեսակետի հետ առնչություն չունի։ Հատուկ ակնկալիք չի եղել, որ Նիկոլ Փաշինյանը պետք է գար հուղարկավորությանը, դա ավելի շատ բարոյական հարթության մեջ գտնվող հարց էր»,- «Առաջին լրատվական»-ի հետ զրույցում նշեց «Սասնա ծռեր» կուսակցության համահիմնադիր Վարուժան Ավետիսյանը՝ խոսելով Եռաբլուրում Արայիկ Խանդոյանի հուղարկավորությանը Նիկոլ Փաշինյանի չմասնակցության շուրջ համացանցում բարձրացված աղմուկի մասին։
Անդրադառնալով իր հասցեին հնչող քննադատություններին, որ Արայիկ Խանդոյանի հուղարկավորության ժամանակ ինքը հարթակն օգտագործեց քաղաքական նկատառումներով հայտարարություններ անելու համար, Վարուժան Ավետիսյանը նշեց. «Արայիկ Խանդոյանը պայքարի առաջամարտիկ էր և նույնիսկ իր մահվանից հետո է շարունակում լինել քաղաքական պայքարի մեջ՝ որպես երևույթ. քաղաքական մարդու՝ հատկապես առաջամարտիկի կյանքի ցանկացած դրվագ չի կարող քաղաքական համատեքստից դուրս լինել, և նույն Արայիկ Խանդոյանի իղձերն ու պատգամներն էին մեզ պարտադրում անդրադառնալ այն ցավոտ հարցերին, որոնք տվյալ պարագայում առնչվում էին նաև նրա հուղարկավորության միջոցառումներին։ Ես ուղիղ ասում եմ, որ անբարոյականություն եմ համարում նման շահարկումը, և ոչ մեկը թող չփորձի մեր պայքարի ընկերոջ, մեր եղբոր հետ կապված խոսքը ներկայացնել նման դիտանկյունից, այսինքն՝ թե ես հարթակն այլ նպատակի եմ ծառայեցրել»։
Մանրամասները՝ տեսանյութում։
