ՊՆ քննչական ծառայության ՀԿԳ քննիչ Լևոն Պետրոսյանը երեկ հայտարարել է անցյալ տարի Տավուշի մարզի Մեհրաբներ զորամասում մահացած Արտակ Նազարյանի քրեական գործով նախաքննության ավարտը, և շուտով այն դատարան կուղարկվի: Քրեական գործն ավարտվեց նախաքննության առաջ քաշած սկզբնական՝ «ինքնասպանության հասցնելու» վարկածով։ Այս մասին տեղեկացնում է Lragir.am կայքը:
Նշենք, որն գործի քննությունը տևել է ավելի քան 11 ամիս, և քրեական գործը կազմված է 9 հատորից: Քրեական գործում միակ փոփոխությունը մտցրեց զինդատախազ Գևորգ Կոստանյանը՝ ևս մեկով ավելացնելով արդեն կալանքի տակ գտնվող 4 մեղադրյալների թիվը, ինչից, սակայն, գործի էությունը չփոխվեց:
Ապրիլի 6-ին նախաքննության մարմինը 5-րդ մեղադրյալին ներգրավեց գործում՝ լեյտենանտի կոչումով Վահագն Հայրապետյանին, ով «հենակետի անձնակազմի ներկայությամբ բռնություն է գործադրել Արտակ Նազարյանի նկատմամբ, բռունցքներով անկանոն հարվածներ հասցրել նրա դեմքին և մարմնի տարբեր մասերին, ինչն առաջացրել է ծանր հետևանք»:
Լեյտենանտ Արտակ Սինարի Նազարյանին ինքնասպանության հասցնելու փաստի առթիվ ՀՀ ՊՆ քննչական ծառայությունը ՀՀ Քրօր 110 հոդվածի 1-ին մասով հարուցված քրեական գործի շրջանակներում 375 հոդվածի 2-րդ մասով նախատեսված հանցագործության կատարման կասկածանքով ձերբակալված են զորամասի գումարտակի ԱՀՏԱ գծով տեղակալ, կապիտան Հակոբ Խորենի Մանուկյանը, իսկ 358 հոդվածի 2-րդ մասի 3-րդ կետի կասկածանքով ձերբակալվել են նույն զորամասի 3 շարքային զինծառայողներ:
Հիշեցնենք, Արտակ Նազարյանը մահացել է 2010 թվականի հուլիսի 27-ին:
