Մեծ Բրիտանիայում հակակոռուպցիոն նոր օրենքի առաջին զոհը Ադրբեջանի Միջազգային բանկի նախկին նախագահի կինն է դարձել՝ Զամիրա Հաջիևան, որը Լոնդոնի միայն մեկ խանութում 16 մլն ֆունտ ստերլինգ ($21,000,000) է ծախսել:
BBC-ի հաղորդմամբ՝ խոսքը Harrods խանութում տաս տարվա ընթացքում կատարած գնումների մասին է: Հաջիևային չի հաջողվել օրենքի շրջանակներում անանուն մնալ։
Այժմ նա պետք է դատարանում պարզաբանի իր հարստության աղբյուրը, հակառակ դեպքում կարող է կորցնել լոնդոնյան խանութի մոտակայքում գտնվող իր 15 մլն ֆունտ արժողությամբ տունն ու Բերքշիրի գոլֆի դաշտը։
Միացյալ Թագավորության «Անբացատրելի հարստության մասին» առաջին օրենքի համաձայն՝ 55-ամյա ադրբեջանուհին պետք է Ազգային քրեական գործակալությանը տեղեկացնի, թե ինչպես են ինքն ու իր ամուսինը՝ Ջահանգիր Հաջիևը, կարողացել ձեռք բերել իրենց մեծ տունը Լոնդոնի թանկարժեք թաղամասում:
