ՀՀ վարչապետ Նիկոլ Փաշինյանի կինը՝ Աննա Հակոբյանը, շատ կարևոր է համարում Բաղրամյան 26-ի ու Ազգային ժողովի այգիների հասանելիությունը քաղաքացիների համար։
«Հատկապես ԱԺ այգին բացելու մասին մտածել եմ, երբ ամուսնուս պատգամավոր եղած ժամանակ զբոսնեցինք այգով։ Հիասքանչ այգի է, հատկապես, որ երեխաները մայրաքաղաքի ծխից ու վտանգավոր արտանետումներից կարող են իրեն թոքերը մաքրել եղևնիների մաքուր օդով։ Ես սպասում էի այս օրվան, շատ հպարտ եմ, որ իմ ամուսնու ձեռքով տեղի ունեցավ»,- «Ազատություն» ռադիոկայանի ֆեյսբուքյան ասուլիսի ժամանակ ասաց նա։
Օգտատերերից մեկն էլ Աննա Հակոբյանից հետաքրքրվել էր պապիլոմա վիրուսի դեմ պատվաստելու հետ կապված և հարցրել՝ արդյո՞ք Աննա Հակոբյանն իր երեխաներին կպատվաստի այդ վիրուսի դեմ։
«Այո՛, իմ աղջիկներին պապիլոմայի դեմ կպատվաստեմ, քանի որ կյանքի բերումով, լինելով լրատվության մեջ և թերթում աշխատելով, մենք բազմիցս ենք ուսումնասիրել և հրապարակումներ արել ՀՀ առողջապահության ոլորտի վերաբերյալ: Ի ուրախություն ինձ՝ մենք միշտ արձանագրել ենք, որ առողջապահության ոլորտում մեր մասնագետները բարձր կարգի են, և ես, անկեղծ ասած, վստահում եմ նրանց»,- ասել է ՀՀ վարչապետի տիկին Աննա Հակոբյանը՝ ի պատասխան օգտատերերից մեկի հարցին:
Վարչապետի տիկինը նշեց, որ, իհարկե, տեղյակ է, ու իր կարծիքով՝ բնական է, որ այդ թեմայի շուրջ կան բազմազան կարծիքներ ու շատ զգուշացումներ, որոնցից անմասն մնալ հնարավոր չէ: