Ղազախստանի նախագահ Նուրսուլթան Նազարբաևը երկրի կառավարության անդամներից պահանջել է ավելի ակտիվ աշխատել, հակառակ դեպքում սպառնացել է, որ նրանց կփոխարինեն ավելի էֆեկտիվ արտասահմանյան մասնագետները։ Նման հայտարարությամբ երկրի ղեկավարը հանդես է եկել հոկտեմբերի 30–ին՝ ժողովրդին ուղղված նախագահական ուղերձով,– հաղորդում է TengriNews պարբերականը։
«Ժամանակին Սինգապուրը աշխարհով մեկ փնտրում էր թոշակի անցածներին, հրավիրում էր իր մոտ, նրանք ղեկավարում էին»,– ասել է Նազարբաևը։ Նա հիշեցրել է, որ Ղազախստանում արդեն իսկ կան ղեկավար պաշտոններ զբաղեցնող արտասահմանցիներ։ «Մեզ մոտ ո՞վ է ղեկավարում Air Astana-ն՝ անգլիացին (ընկերության նախագահը Մեծ Բրիտանիայի քաղաքացի Փիթեր Ֆոսթերն է)։ Ո՞վ է ղեկավարում Նազարբաև համալսարանը՝ ճապոնացին (բուհի նախագահը Ճապոնիայի քաղաքացի Շիգեո Կատսուն է)»,– ընդգծել է նա։
«Տեսեք, եթե նորմալ չաշխատեք, ես բոլորին այնտեղից կհրավիրեմ՝ ձեր փոխարեն»,– սպառնացել է Նազարբաևը նախարարների խորհրդի անդամներին։