Երկուշաբթի առավոտյան նավթի համաշխարհային գները շարունակում են աճել: Պատճառն Իրանի դեմ ԱՄՆ պատժամիջոցներն են, որոնք ուժի մեջ կմտնեն նոյեմբերին. այդ ֆոնին շուկայում հումքի պակասուրդ կարող է առաջանալ: Բացի այդ, ԱՄՆ-ում նվազեցվում է նավթարդյունահանման նպատակով աշխատող հորատման սարքավորումների թիվը, հաղորդում է Market Watch-ը:
Երևանի ժամանակով՝ 7.44-ի տվյալներով՝ Brent տեսակի նավթի դեկտեմբերյան ֆյուչերսների արժեքն ավելացել է 0,53 տոկոսով՝ մեկ բարելի դիմաց հասնելով 83,18 դոլարի:
WTI տեսակի նավթի նոյեմբերյան մատակարարումների արժեքն ավելացել է 0,38 տոկոսով՝ մեկ բարելի դիմաց 73,53 դոլարի հասնելով:
Strategic Energy & Economic Research-ի նախագահ Մայքլ Լինչը հայտարարել է, որ Թեհրանի դեմ պատժամիջոցներն, ըստ երևույթին, արդյունավետ են, քանի որ իրանական նավթի որոշ գնորդներ սկսել են խուսափել այն գնելուց: Խոսքը հնդկական և չինական ընկերությունների մասին է: