«Իմ տեսանկյունից, սա, հավանաբար, կարևորագույն կետն է գործընթացում 2001 թվականից ի վեր, երբ Քի Ուեսթում ջանքեր էին գործադրվում խաղաղ համաձայնության հասնելու համար»,- անդրադառնալով այսօր Կազանում կայանալիք Ռուսաստանի, Հայաստանի և Ադրբեջանի նախագահների հանդիպմանը, Բրադկեն ասել է«Ազատություն» ռադիոկայանին:
«Հիմնարար սկզբունքները, պետք է ասեմ, խաղաղ համաձայնագիր չեն: Դրանք շրջանակային փաստաթուղթ են: Դրանք հինգևկես էջ զբաղեցնող 14 կետից բաղկացած ուղեցույց են կողմերի համար, թե ինչպես բանակցել կարգավորման հասնելու համար: Դրանք հրահանգներ են նախարարների համար, թե ինչպես մշակել վերջնական խաղաղ կարգավորմանը առնչվող կարևորագույն հարցերը», – մանրամասնել է ամերիկացի համանախագահը՝ նշելով, որ փաստաթղթի շուրջ բանակցությունները երկար են ընթացել, առավել ինտենսիվորեն՝ 2007 թվականի վերջից:
«Համանախագահները՝ Միացյալ Նահանգները, Ռուսաստանը, Ֆրանսիան, այդ թվում՝ իմ նախորդը, դրա վրա աշխատել են տարիներ՝ փորձելով մոտեցնել այն կողմերի համար ընդունելի ձևակերպումներին: Այժմ մենք հասել ենք (այդ) փուլին, և ես մեկ անգամ ևս հղում եմ անում Դովիլի հայտարարությանը, որտեղ համանախագահ երկրների երեք նախագահները ասել են, թե հավատում են, որ սեղանի վրա եղած ներկայիս տարբերակը արդարացի և հավասարակշռված փաստաթուղթ է: Դա հնարավորություն կտա կողմերին առաջ շարժվել և բանակցել վերջնական պայմանագրի շուրջ», – ասել է Բրադկեն՝ կրկին ընդգծելով. – «Հետևաբար, կրկնեմ, մենք բավական կարևոր կետում ենք»:
Նա շեշտել է, որ թեև Կազանի հանդիպումը հյուրընկալում է Ռուսաստանի նախագահ Դմիտրի Մեդվեդևը, Միացյալ Նահանգները նույնպես շատ ակտիվ է բանակցային գործընթացում: Ամերիկացի միջնորդը նշել է նաև ԱՄՆ-ի պետքարտուղար Հիլարի Քլիթոնի ակտիվ ներգրավվածությունը գործընթացում՝ հիշատակելով անցած տարի նրա Հայաստան և Ադրբեջան կատարած այցերը, պարբերական հանդիպումները երկու երկրների ղեկավարների, արտգործնախարարների հետ:
«Մեր ընդհանուր շահն այն է, որ պատերազմ չլինի: Մենք համամիտ ենք ֆրանսիացիների և ռուսների հետ, որ, իրոք, խաղաղ կարգավորմանը այլընտրանք չկա», – հայտարարել է Ռոբերտ Բրադկեն՝ ամփոփելով. – «Ահա այստեղ ենք մենք, և հարցը հետևյալն է՝ ունե՞ն կողմերը քաղաքական կամք՝ որոշում կայացնելու, սկզբունքները ընդունելու, ապա անցնելու հաջորդ փուլին, որը սկզբունքները վերջնական խաղաղ կարգավորման դետալների վերածելն է»:
