shamshyan.com-ի փոխանցմամբ՝ երեկ՝ հունվարի 9-ին, արտակարգ դեպք է տեղի ունեցել Արմավիրի մարզում: Ժամը 18:30-ի սահմաններում Արտամետ գյուղի բնակիչ, 50-ամյա Տոնական Ղազարյանը Բաղրամյան-Արտամետ ավտոճանապարհի 5-րդ կմ-ին իր կողմից վարած Mitsubishi Montero մակնիշի 33 VՏ 128 համարանիշի ավտոմեքենայով հարվածել է Նոր-Արտագես գյուղի բնակիչ, 43-ամյա Զադա Բրոյանին պատկանող ոչխարի հոտին:
Ինչպես Արմավիրի մարզից հայտնում է shamshyan.com-ը, արդյունքում 35 ոչխարից 30-ը սատկել են, որոնց մեծ մասը ծագով են եղել:
shamshyan.com-ի հետ զրույցում Զ. Բրոյանն ու նրա հարազատները զայրացած հայտնում էին, որ վարորդը հոտին հարվածելուց հետո իջնում է ավտոմեքենայից ու հայհոյանքներով հարձակվում իրենց վրա, այնուհետև զանգահարում ու վթարի վայր է կանչում իր տղային, ով էլ Mercedes-ով ժամանում է իր ընկերների հետ ու նորից սկսում լկտի պահվածք դրսևորել իրենց նկատմամբ:
Այդ ամենից հետո սկսում են հարվածել Զ. Բրոյանին պատկանող ВАЗ 2121 մակնիշի 28 ՕՍ 490 համարանիշի ավտոմեքենային: Դեպքի վայր են ժամանում ոստիկանության Բաղրամյանի բաժնի օպերատիվ խումբը՝ հետաքննիչի գլխավորությամբ, ովքեր կարողանում են միայն հայտնաբերել Տ. Ղազարյանի ավտոմեքենան և այն տեղափոխում են ոստիկանության Բաղրամյանի հատուկ պահպանվող տարածք:
Արդեն կեսգիշերին ոստիկանության Արմավիրի մարզային վարչության օպերատիվ կառավարման կենտրոն ահազանգ է ստացվում Արմավիրի բժշկական կենտրոնից, որ մարմնական վնասվածքներով իրենց մոտ է տեղափոխվել Տ. Ղազարյանը, սակայն գյուղացիներն իմանալով այդ մասին՝ հայտնում էին, որ նա ոչ մի վնասվածք էլ չի ստացել, պարզապես պատասխանատվությունից խուսափելու համար ժամեր անց դիմել է բժշկական օգնության:
Ըստ գյուղացիների պատմածի՝ Տ. Ղազարյանի կինը Արտամետի գյուղապետն է: Տուժածները հայտնում էին, որ իրենց միակ հույսը ՀՀ ոստիկանապետ Վլադիմիր Գասպարյանն է, քանի որ գյուղապետի ամուսինը իր տղայի հետ ամեն անգամ քաղաքացիների նկատմամբ ցուցաբերել են անհարգալից վերաբերմունք, սակայն Բաղրամյանի ոստիկանությունը ոչինչ չի ձեռնարկել՝ նրանց կարգի հրավիրելու համար:
Մանրամասները՝ shamshyan.com-ում
