«Հայփոստի» Վանաձորի մասնաճյուղի տնօրեն, ՀՀԿ-ական, Վանաձոր համայնքի ավագանու նախկին անդամ, ՏԻՄ ընտրություններում քաղաքապետի նախկին թեկնածու Էդվարդ Խլղաթյանի որդու՝ Ազատ Խլղաթյանի նկատմամբ 2013 թվականի դեկտեմբերի 28-ից հայտարարված է հետախուզում:
Քրեական գործը հարուցվել է 2013-ի դեկտեմբերի 12-ին՝ Տավուշի մարզային քննչական բաժնում, ՀՀ Քր. օր.-ի 258 հոդվածի 4-րդ մասի և 235 հոդվածի հատկանիշներով՝ զենքի գործադրմամբ խուլիգանություն և անօրինական զենքի կրում:
«Դրուժբա» ռեստորանում տեղի է ունեցել վիճաբանություն, որին հաջորդել է ծեծկռտուք, և արդյունքում տուժողներն ստացել են մարմնական վնասվածքներ: Վիճաբանության մասնակիցների թվում՝ Աշոտ, Վիգեն, Հովհաննես, Սեյրան և ուրիշներ, եղել է նաև Ազատ Խլղաթյանը, որը ինքնաձիգից կրակոցներ արձակելով՝ դիմել է փախուստի:
Հայր և որդի Խլղաթյանների անունները նախկինում էլ են շրջանառվել տարբեր քրեական գործերում: Այժմ երկուսն էլ անցնում են փաստաբան Սամվել Շարբաթյանի սպանության աղմկահարույց գործով, ընդ որում՝ Էդվարդ Խլղաթյանը սկզբում որպես կասկածյալ, ապա՝ գործով վկա: Այդ գործի շրջանակներում իրավապահները նույնիսկ խուզարկություն են կատարել՝ Խլղաթյանների տանը թմրամիջոց հայտնաբերելու համար:
