Մանկական երկաթուղու տարածքում, ինչպես տեղեկացրել էինք, այսօր 5 աղջիկների են ձերբակալել: Աղջիկներից մեկի ձեռքին եղել է հուշանվեր թուր, ինչը նկատել են տարածքի տերերը եւ աղջիկներին ասել, որ հեռանան տարածքից` վիրավորելով աղջիկներին: Մինչեւ աղջիկները կհեռանային տարածքից` հայտնվել են ոստիկանները, որոնք, հրելով, աղջիկների մազերը քաշելով, մեքենա են նստեցրել, անվանել էմոյական: Գեղարվեստի ակադեմիայի ուսանողուհի Բելան, ով առաջինը դուրս եկավ ոստիկանությունից, նշեց, որ այս վերջին շրջանում աղջիկներին հաճախ են ոստիկանները մոտենում եւ ասում` էմոյակա՛ն եք: Այնինչ աղջիկներից որեւէ մեկը այդ խմբին չի պատկանում:
Եթե անգամ աղջիկները էմոյական շարժման ներկայացուցիչ լինեին, արդյո՞ք իրավունք ունեն նրանց բերման ենթարկելու, Հելսինկյան ասոցիացիայի նախագահ Միքայել Դանիելյանը նշեց՝ իհարկե, ոչ: Ըստ նրա` սա նորմալ ոստիկանական պետության ձեւ է, ֆաշիզմի ձեւակերպումներից մեկն է, երբ ոչ ֆորմալ մարդկանց, ոչ ֆորմալ կազմակերպություննեին չեն սիրում: «Այդպես որ լինի, հիմա պետք է սկսեն ջազմեններին բռնել, ռեպերներին, կարճ հագած աղջիկներին եւ այլն»,-նշեց նա:
Նրա խոսքերով, այն ինքնասպանությունները, որոնց պատասխանատվությունը գցում են էմոյական շարժման, ինչպես նաեւ Եհովայի վկաների վրա, սուտ են: Քաղմասներում եւ բանակում սպանում են ո՛չ Եհովայի վկաները, ո՛չ է էմոյականները, այլ հայ քրիստոնյաները: Իսկ բանակում ինքնասպանության հասցնում են ոչ թե Եհովայի վկաները, այլ հայ սպան, ով հայ առաքելական եկեղեցում մոմ է վառում: Ըստ նրա` այս տեմպերով մենք լուրջ զինվորա-ոստիկանական պետություն ենք դառնում, իսկ զինվորական ոստիկանական պետության ձեւերից մեկը ֆաշիզմն է:
