«Սիրիա զորախումբ ուղարկելը կարող է անկանխատեսելի հետևանքներ ունենալ Հայաստանի համար»,- «Առաջին լրատվական»- ի հետ զրույցում իր մտահոգությունն արտահայտեց հրապարակախոս Հրանտ Տեր-Աբրահամյանը:
Անդրադառնալով Երևանի ավագանու նախընտրական քարոզարշավին՝ Տեր-Աբրահամյանը նշեց, որ քաղաքապետի ընտրությունները երբևիցե այս աստիճանի քաղաքականացված չեն եղել: Նրա խոսքով՝ այս ընտրությունները ստուգատես են Ազգային ժողովի ընտրություններից առաջ: «Երբ որ ընտրական պրոցեսը բացարձակապես քաղաքականացվում է, բնականից սկսվում է «սևի և սպիտակի» բևեռների բաժանումը»,- նշեց հրապարակախոսը: Նա նաև կարծիք հայտնեց, որ սահմանի լարվածությունն ու ներքաղաքական սրացումները, թվում է, փոխկապակացված են, և անհրաժեշտ է աչալուրջ լինել:
Անդրադառնալով Ն. Փաշինյանը հայտարարությանն այն մասին, որ Ռուսաստանի հետ հարբերությունները աննախադեպ բարձր մակարդակի վրա են, Տեր-Աբրահամյանը նշեց. «Փաշինյանն իր նպատակն է ցույց տալիս… Հակառակ կողմը՝ Քոչարյանը և այդ ճամբարը իր քարոզչությունը կառուցում էր նրա վրա, որ իբրև թե նոր իշխանության հարաբերությունները Ռուսաստանի հետ վատ են, և մեր անվտանգությունը վտանգված է, այդպիսի թեմա իրականում չկա, նրանք այդ թեման մտցնում են ներքին իշխանության պայքարի նպատակով: Եվ եթե մի կողմը սկսում է իր քաղաքականությունը կառուցել դրսի վրա հենվելով, մյուս կողմն էլ ստիպված սկսում է պատասխանել, և իհարկե դրանից օգտվում է նաև Ռուսաստանը»:
Նիկոլ Փաշինյանը Ֆրանսիայում բացառեց, որ ՀՀ ԱԱԾ տնօրենի և ՀՔԾ պետի հեռախոսազրույցի գաղտնալսումը հնարավոր է իրականացվել և հրապարակ է նետվել դրսի ուժերի կողմից. անդրադառնալով այս դիտարկմանը՝ հրապարակախոսը նշեց, որ Նիկոլ Փաշինյանն ի պաշտոնե պետք է բացառեր, սակայն դա չի բացառվում: «Ինչ էլ լինի, այդ գաղտնալսումը շատ լուրջ մարտահրավեր է երկրին, երկրի ղեկավարությանը: Իհարկե, եթե ԱԱԾ պետին լսել են, կարող են և վարչապետին լսել, սա կատակ չէ, այլ ինչ-որ տեղ պատերազմի հայտարարություն է: Եվ դրա համար պետք է լրջանալ»,- ընդգծեց Տեր-Աբրահամյանը:
Մանրամասն՝ տեսանյութում:
