«Սարդարապատ» շարժման նախաձեռնող խմբի նշանակված հանդիպումը երիտասարդության հետ ճարտարապետների միության կողմից արգելվել է անցկացնել միության շենքում, չնայած նախօրոք պայմանավորվածություն կար: Այս մասին հայտնում են «Սարդարապատ» շարժման նախաձեռնող խմբի անդամները:
Տիգրան Խզմալյանի խոսքերով, միջոցառման անցկացման արգելումը այսօր Ստրասբուրգում ՀՀ նախագահի ելույթից հետո և Կազանի հանդիպումից մեկ օր առաջ պատահական չէ. «Մեր երկրում թույլ են տալիս անցկացնել տարբեր աղանդավորական և շատ այլ կասկածելի կազմակերպությունների հավաքներ, սակայն, չնայած մենք նախօրոք վճարել էինք ճարտարապետների միության դահլիճում միջոցառում անցկացնելու համար, այսօր ժամը 1-ին տեղեկացրին,որ հանդիպումը չի կարող տեղի ունենալ, և այդ մերժման համար ոչ մի պատճառաբանություն չներկայացրին։ Բայց, կարծում եմ, պատճառներն ակնհայտ են»,- ասում է Տիգրան Խզմալյանը:
Հրավիրված ասուլիսի ընթացքում խոսեց նաև Գարեգին Չուգասզյանը։ «Մենք այս ամենը գնահատում ենք որպես ժողովրդավարության և ազգային անվտանգության արժեքների ոտնահարում, բայց կարծում ենք, որ մեր դեմ ուղղված այս քայլը ավելի է ուժեղացնելու մեր դիրքը»:
Ասուլիսի ավարտին «Սարդարապատ» շարժման անդամները նշեցին, որ իրենց շարժումը, ինչպես և հայ հասարակությունը, պատրաստ չէ մի թիզ հող անգամ զիջել ազատագրված տարածքներից և պատրաստ է պայքարել ու պատասխան պահանջել իշխանություններից և նրանց հետ գործարքի գնացած ընդդիմադիր ուժերից, եթե վաղը Կազանում տարածքների զիջումների մասին որևէ փաստաթուղթ ստորագրվի:
«Սարդարապատ»-ի նախաձեռնած հանդիպումը երիտասարդների հետ այնուամենայնիվ կկայանա Պուշկինի 38 հասցեում: