Ժամեր առաջ ՀՀ պաշտպանության նախարարության զինվորական հոսպիտալից «Արմենիա» հանրապետական բժշկական կենտրոնի անոթային վիրաբուժության բաժին է տեղափոխվել Նուբարաշենի հատուկ ջոկատի զինվոր 20-ամյա Անդրանիկ Արամյանը: Անդրանիկը գանգատվել է մեջքի և ուսի հատվածում սուր ցավերից: Մեզ հետ զրույցում զինվորի հայրը` Գրիգոր Արամյանը, նշեց, որ պատճառը զորամասի ճաշարանում տեղի ունեցած միջադեպն է: «Անդրանիկն ապարանցիների մասին անեկդոտ է պատմել, ինչից վիրավորված՝ ապարանցի զինվորներից մեկը դանակով երկու անգամ հարվածել է մեջքի և ուսի հատվածներին: Հոսպիտալում նրան վերջին երեք օրվա ընթացքում ոչ մի օգնություն ցույց չեն տվել, ոչ մի ցավազրկող»,- արցունքն աչքերին ավելացրեց Գրիգորը: Միջադեպի մանրամասները փորձեցինք պարզել հենց տուժածից, սակայն նա մերժեց՝ պատճառաբանելով, թե ոչինչ չի հիշում: Բժիշկները նախնական զննմամբ Անդրանիկի հարազատներին հայտնել են, որ զինվորի վիճակը նորմալ է: Որոշ բժշկական հետազոտություններից հետո պարզվեց, որ նրան պետք է շտապ վիրահատել:
Ի դեպ, Անդրանիկ Արամյանը պետք է զորացրվեր սույն թվականի դեկտեմբերի 10-ին: Նրան՝ որպես լավ զինվորի, պատվոգիր է շնորհվել:
Նշենք, որ միջադեպը տեղի է ունեցել 20 օր առաջ:
Ի դեպ հիվանդանոցում էր գտնվում նաև ՀՀ պաշտպանության նախարար Սեյրան Օհանյանը: Փորձեցինք նրանից պարզել միջադեպի մանրամասները, սակայն նրա թիկնապահները թույլ չտվեցին մոտենալ նախարարին՝ պատճառաբանելով, որ նախարարի մոտ ընդունելության համար հատուկ ժամեր կան, և որ պարոն Օհանյանը եկել է հիվանդանոց հարազատներից մեկին այցելության: Եվ միաժամանակ այցելել էր նաև վիրավոր զինվորին: