«Առաջին լրատվական»- ի հետ զրույցում անդրադառնալով դիտարկմանը, որ այսօր սկանդալային գաղտնալսման հետ կապված հայտարարություն են տարածել Ռոբերտ Քոչարյանի պաշտպանները՝ ընդգծելով, որ իրենց պաշտպանյալի նկատմամբ իրականացվում է ոչ օրինական քրեական հետապնդում, փաստաբան, Մարտի 1-ի զոհերի իրավահաջորդների շահերի ներկայացուցիչ Վահե Գրիգորյանը նշեց. «Պաշտպանության կողմի դիրքորոշումը ի սկզբանե դա է եղել: Գաղտնալսման հետ կապված, ենթադրում եմ, որ պաշտպանության կողմի մեխը պիտի լինի դատարանի վրա ազդեցություն գործելը»:
«Ես չեմ կարծում, որ այս սկանդալը որևէ ազդեցություն է ունենալու և ինչ-որ բան է փոխելու Մարտի 1-ի գործում: Ամեն ինչ կախված է նրանից, թե քննությունն ինչ ցույց կտա, եթե քննությամբ պարզվի, որ իսկապես կոմունիկացիա եղել է ԱԱԾ տնօրենի և դատավորի միջև, այդ դեպքում դա իրավական գնահատականի արժանի է, պետք է իրավական գնահատական տալ և դրանից ենթադրություններ անել: Եթե այդ հանգամանքը բացակայում է, ոչ մի ազդեցություն չի ունենա:
Այս գործը հնարավոր չէ այսպիսի աղմուկներով փակուղի տանել: Որևէ պաշտոնյայի սխալը, եթե դրանով որևէ ապացույց չի խոտանվել, ոչ մի ազդեցություն չի թողնի այս գործի վրա: Իրականում այսպիսի աղմուկները ուշադրություն գրավելու միտում ունեն»:
Վահե Գրիգորյանի հավաստմամբ՝ Մարտի 1-ի գործով բեկումնային զարգացումներ են սպասվում: «Սեպտեմբերի 20-ին ՄԻԵԴ-ը հրապարակելու է «Մուշեղ Սաղաթելյանն ընդդեմ ՀՀ-ի» և «Վարդգես Գասպարին ընդդեմ ՀՀ-ի» գործերի վճիռները, այս գործերը վերաբերում են 2008թ մարտի 1-ի առավոտյան Ազատության հրապարակում տեղի ունեցած դեպքերին: Այս գործերը թեև վերաբերում են անհատների, բայց ՄԻԵԴ-ն իր դիրքորոշումն է արտահայտելու, թե որքանով են իրավապահ և արդարադատության համակարգերը կարողացել համարժեք պատասխան տալ այն իրավախախտումներին, որոնք տեղի են ունեցել Հայաստանում:
Սա հարյուրավոր մարդկանց հնարանվորություն է տալու պահանջել իրենց գործերի վերաբացում, խոսքն այն մարդկանց մասին, է, ովքեր մարտի 1-ին ձերբակալվել, դատապարտվել են: Այս ողջ ծավալը էականորեն տրանսֆորմացնելու է արդարադատության համակարգը: Որևէ դատավոր, որը անարդարացիորեն դատապարտել, կալանավորել է որևէ մեկի այդ գործի շրջանակում և չի նկատել էական խախտումները, չի կարող մնալ ՀՀ-ի արդարադատության համակարգում:
Երկրորդ պրոցեսը՝ ՀՔԾ պետի մասնակի բացահայտումներից ակնհայտ է, որ Մարտի 1- ի գործը ընդհանուր կարգով բարձր ընթացքով առաջ է գնում և Տիգրան Աբգարյանի մահվան հանգամանքների կապակցությամբ շատ կարևոր, բեկումնային կետի է հասել:
Եվ երրորդ պրոցեսը՝ երկրորդ նախագահի կալանքի գործով Վճռաբեկ դատարանում քննությունն է: Սա միայն երկրորդ նախագահի կալանքի գործը չէ, մենք հասել ենք բեկումնային կետի, որտեղ Հայաստանի Հանրապետության արդարադատության համակարգը պետք է տա հետևյալ հարցի պատասխանը՝ արդյո՞ք ՀՀ-ն կարող է հանդուրժել սահմանադրական կարգի նկատմամբ ոտնձգությունը՝ անձեռնմխելիությամբ պաշտպանելով ոտնձգության մեջ մեղադրվողին, թե՞, այնուամենայնիվ, սահմանադրական կարգի նկատմամբ ոտնձգություն իրականացնող անձը չի կարող պաշտպանություն ունենալ անձեռնմխելիությամբ: Սա վճռական հարց է»:
Մանրամասն՝ տեսանյութում: