«Հայկական ժամանակ» օրաթերթի գլխավոր խմբագիր, քաղբանտարկյալ Նիկոլ Փաշինյանը իր պաշտպան փաստաբան Վահե Գրիգորյանի միջոցով հայտարարություն է տարածել` ի պատասխան ՔՎ խոսնակ Արսեն Բաբայանի «հերթական սուտ» հայտարարությանը:
«2010 թվականի նոյեմբերի 16-ին ՀՀ արդարադատության նախարարության քրեակատարողական վարչության հասարակայնության հետ կապերի բաժանմունքի պետ Արսեն Բաբայանը հայտարարել է, թե իբր Նիկոլը երկարատև տեսակցությունից հետո հրաժարվել է մուտք գործել բնակելի գոտի և իբր իր բանավոր դիմումի հիման վրա ՔԿՀ վարչակազմը իրեն մեկուսացրել է անվտանգության նկատառումներով: Նիկոլը միանշանակ պնդում է, որ այս տեղեկատվությունը չի համապատասխանում իրականության: Նոյեմբերի 14-ին տեղի է ունեցել հետևյալը. երկարատև տեսակցությունից հետո ՔԿՀ-ի հերթապահ խմբի պատասխանատու հերթապահ Ֆահրադ Մարտիրոսյանը, անվտանգության ապահովման բաժնի պետ Արտավան Բաղդասարյանն իրեն արգելել են մուտք գործել բնակելի գոտի` պատճառաբանելով, թե օպերատիվ տեղեկություններ ունեն, որ իր կյանքի և անվտանգության համար բնակելի գոտում սպառնալիքներ կան, ուստի իրենք որևէ պարագայում թույլ չեն տալու մուտք գործել բնակելի գոտի, և իրեն առաջարկել են դիմում գրել, համաձայն որի ինքը խնդրում է, որ իրեն տեղափոխեն բնակելի գոտուց առանձին տարածք` անվտանգության ապահովման նկատառումներով: Նիկոլը պատասխանել է. «Օպերատիվ տեղեկությունը դուք ունեք, իմ անվտանգության պատասխանատուն, ըստ օրենքի դուք եք, դուք էլ ապահովեք այդ ամենը», և հրաժարվել է դիմում գրել: Հետո իրեն առաջարկվել է արձանագրություն կազմել, ըստ որի, ինքը խնդրում է իրեն տեղափոխել: Նիկոլը հրաժարվել է նաև նման արձանագրության կազմմանը մասնակցել: Ավելի ուշ Նիկոլ Փաշինյանը դիմելով ՔԿՀ պետին հետաքրքրվել է, թե որն է իրեն մեկուսացնելու պատճառը: Իրեն պատասխանել են, որ իր անվտանգությունն ապահովելու նկատառումներից ելնելով են իրեն մեկուսացրել: Բայց մեկուսացնելով հանդերձ իր նկատմամբ կիրառել են պատժախցում գտնվող դատապարտյալի նկատմամբ կիրառվող սահմանափակումները: Այն ինչ արդարադատության նախարարությունը հայտարարել է միանշանակ սուտ է, Նիկոլը որևէ դիմում չի գրել, ոչ բանավոր և ոչ էլ գրավոր որևէ մեկին չի խնդրել իրեն տեղափոխել»- Նիկոլ Փաշինյանի հետ երեկ տեսակցելուց հետո, նրա խոսքերն է փոխանցել փաստաբան Վահե Գրիգորյանը:
Վահե Գրիգորյանը տեղեկացրել է նաև, որ երեկ «Կոշ» ՔԿՀ-ի վարչակազմը խոչընդոտել է իր և Նիկոլ Փաշինյանի տեսակցությանը: Փաստաբանը Նիկոլ Փաշինյանի հետ տեսակցելու դիմում է ներկայացրել ժամը 15.30-ին, որը, ըստ ՔԿՀ-ի գրանցման, մուտքագրվել է 15.38-ին: Սակայն, տեսակցության հնարավորություն տվել են մոտ 40 րոպե սպասեցնելուց հետո: Իսկ արդեն ժամը 17.10-ին ՔԿՀ-ի աշխատակիցները ընդհատել են տեսակցությունը` հայտարարելով, թե տեսակցության ժամն ավարտվել է: «Այսօրվա առանձնատեսակցությունը դադարեցնելը Նիկոլի պաշտպանական իրավունքի խախտում է: Այդպիսով խոչընդոտել են նաև նրա ԵԴ ներկայացվելիք դիմումը պատրաստելու աշխատանքներին: Նա այս պահին չի կարող գրագրություն ունենալ, նա զրկված է ԶԼՄ-ների հետ անմիջական շփվելու հնարավորությունից և այպիսով անօրինական ձևով խստացվել է նրա պահման ռեժիմը»,- տեղեկացրել Վահե Գրիգորյանը:
