«Կապիտալը» տեղեկացնում է, որ Հայաստանի տրանսպորտի և կապի նախարարությունը կարծես ձախողում է Հյուսիս-հարավ ավտոմոբիլային ճանապարհի ծրագիրը, «Այս ծրագրի շրջանակում դեռևս 2010 թ. արդեն պետք է մեկնարկեր 11.7 կմ երկարությամբ Երևան-Աշտարակ ճանապարհահատվածի վերակառուցումը, բայց նախարարության կողմից նոյեմբերին անցկացված մրցույթում այդպես էլ հաղթող չճանաչվեց»,- գրում է թերթը և հավելում. «Ներկայում պարզվում է, որ նախարարությունը ոչ միայն չի կարողացել գարնան ընթացքում կազմակերպել այս մեծ ծավալի աշխատանքները կատարող ընկերության մրցույթը, այլև որոշել է էլ ավելի «գիրացնել» փաթեթը։
«Թեև նախարարությունը չի նշում այս ընդհանուր մրցութային փաթեթի արժեքը, այդուհանդերձ, մոտավոր հաշվարկներով՝ այն կկազմի առնվազն $130 մլն։ Ուռճացնելով փաթեթը՝ նախարարությունն ըստ էության խախտել է բոլոր հնարավոր և անհնար ժամանակային գրաֆիկները՝ դրանով իսկ պետությանը հասցնելով նյութական վնասներ»։
«Ըստ էության, միջազգային ընկերությունները ցանկացած պահի կարող են մեքենայություններ անել, և չինովնիկները, հնարավոր է, պարզապես չնկատեն, քանի որ առկա է պրոֆեսիոնալիզմի պակաս։ Այն, որ տրանսպորտի և կապի նախարարության չինովնիկներն այնքան էլ ձեռնահաս չեն վերահսկման բնագավառում, վկայում է թերևս այն, որ այս տարի գարնանային հեղեղումների պատճառով զգալիորեն վնասվել են հանրապետության մի շարք միջպետական և հանրապետական նշանակության ավտոճանապարհներ»,- գրում է թերթը:
