Ադրբեջանական ANS PRESS-ի փոխանցմամբ, երեկ Ադրբեջանի նախագահ Իլհամ Ալիևը Բրյուսելում հանդիպում է ունեցել ԵՄ նախագահ Հերման Վան Ռոմպեյի հետ։
Հանդիպման ժամանակ Ալիևը նշել է, որ իրենց ոգևորել է ոչ վաղ անցյալում հակամարտության կարգավորման սկզբունքների մասին Մինսկի խմբի համանախագահող երկրների ղեկավարների հայտարարությունը.
«Մեզ շատ է ոգևորել այդ հայտարարությունը, որ ստատուս քվոն անընդունելի է ու այն պետք է փոփոխության ենթարկվի։ Մենք ցանկանում ենք, որ հակամարտությունը շուտափույթ կարգավորվի, որպեսզի հարյուր հազարավոր ադրբեջանցիներ կարողանան վերադառնալ իրենց տները»։
Վան Ռոմպեյն իր հերթին նշել է, որ ԵՄ-ը մեծապես աջակցում է այդ ձգձգված հակամարտության խաղաղ կարգավորմանը. «Ժամանակն է ձեռնարկել լրացուցիչ փորձեր՝ հիմնարար սկզբունքների մասին փաստաթղթի վրա տարվող աշխատանքներն ավարտին հասցնելու համար։ ԵՄ-ն աջակցում է ԵԱՀԿ Մինսկի խմբի գործունեությունը։
ԵՄ-Ադրբեջան կապերի մյուս կենտրոնական տարրը էներգետիկ ոլորտն է։ Մենք վստահ ենք, որ հետագայում նույնպես Ադրբեջանը կշարունակի զգալի ծավալով եվրոպական շուկաներին ապահովել էներգակիրներով»։
Ալիևը նաև նշել է, որ ԵՄ-ի ու Ադրբեջանի միջև էներգետիկ համագործակցությունն ունի լավ պատմություն, այսօր Եվրոպան վերածվում է ադրբեջանական էներգապաշարների հիմնական սպառողի։
