«Սա արտահերթ լիագումար նիստ է, և գումարման առիթը մոտ օրերս Կազանում կայանալիք հանդիպումն է։ Մենք մտավախություն ունենք, որ ինչպես միշտ, այս անգամ ևս հայ փախստականների իրավունքների հանդեպ խտրական վերաբերմունք կցուցաբերեն»,- մեզ հետ զրույցում ասաց Ադրբեջանահայերի համագումարի կազմկոմիտեի անդամ Արարատ Ծատուրյանը։
Այսօր Ցեղասպանության ինստիտուտում կայացած համաժողովի ընթացքում հայ փախստականների իրավունքների պաշտպանությամբ զբաղվող միությունները հանդես եկան միասնական հայտարարությամբ, որն ուղղված է միջազգային միջնորդներին և ՀՀ կառավարությանը և կոչ է անում ձեռք առնել միջոցներ՝ հայ փախստականների հայրենադարձության իրավունքը իրականացնելու համար։ Միջազգային հանրության խտրական վերաբերմունքի դեմ ակտիվ պայքարին մասնակցում է նաև ազգագրագետ Հրանուշ Խառատյանը։
Մեզ հետ զրույցում տիկին Խառատյանը հիշեցրեց, որ Եվրոպայի խորհրդի, ՄԱԿ-ի, ԵԱՀԿ-ի կողմից հրապարակված ոչ մի փաստաթղթում չի քննարկվում հայ փախստականների վերադարձի հարցը։ «Նույնիսկ Ճգնաժամային խումբը իր զեկույցներում հիշեցնում է, որ ազատագրված տարածքներում հայերը, ոչ թե միայն Հայաստանի քաղաքացիները, իրավունք չունեն ապրել։ Ի՞նչ է, հայերը բորո՞տ են։ Սա արդեն ոչ միայն մարդու իրավունքների, այլև ազգի իրավունքների ոտնահարում է»,- ասաց Հրանուշ Խառատյանը։