Հայկական կառավարությանն առընթեր Միջուկային անվտանգության կարգավորման պետական կոմիտեի նախագահ Աշոտ Մարտիրոսյանն անհնար է համարում Հայաստանից Վրաստան մաքսանենգ ճանապարհով ուրանի ներթափանցումը։ Ինչպես հայտնել է «Նովոստի-Արմենիան», օրերս Ա.Մարտիրոսյանը հայտարարել է. «Հայաստանում միջուկային բոլոր նյութերը՝ սկսած ՀԱԷԿ-ի համար նախատեսված միջուկային վառելիքից, ավարտած ընկերությունների համար ամենաչնչին ծավալներով՝ միկրոգրամներով, Պետկոմիտեի և ՄԱԳԱՏԷ-ի վերահսկողության տակ են։ Չեմ կարող ասել, թե ինչպես է այդ ուրանը ներթափանցել, բայց Հայաստանում չկա և չի կարող նման հարստացված ուրան լինել»,- ասել է Մարտիրոսյանը։ Նա նշել է, որ Հայաստանում օգտագործվում է երեք տեսակի հարստացված ուրան՝ 1,6%, 2,4% և 3,6%, իսկ Վրաստանում հայտնաբերված ուրանի հարստացման մակարդակը կազմում էր 87 տոկոս։ «Սա առավելագույն հարստացված ուրան է, իսկ մեզ մոտ երբեք 87-տոկոսանոց ուրան չի եղել»,- ասել է Մարտիրոսյանը` միաժամանակ նշելով, որ ուրանը չէր կարող անհետանալ Հայկական ԱԷԿ-ի տարածքում գտնվող միջուկային թափոնների պահեստից: Բացի այդ, օգտագործված ուրանը պահվում է վառելիքային տարայում, որի քաշը 250 կգ է։ «Այնտեղից հնարավոր չէ ուրան հանել, քանի որ մարդն այնպիսի ճառագայթում կստանա, որ տեղից չի կարող շարժվել»,- ասել է Պետկոմիտեի ղեկավարը։ Մարտիրոսյանը նշել է, որ Հայաստանի հեղինակությունը որևէ կերպ չի տուժի «միջուկային մաքսանենգության» գործից, քանի որ հանրապետությունը հստակ կատարում է իր բոլո պարտավորությունները միջազգային կոնվենցիաների շրջանակներում և որևէ շեղում չի արձանագրվել, հայտնել է «Նովոստի-Արմենիան»:
Հիշեցնենք, որ 2010թ. մարտին Վրաստանի հատուկ ծառայությունների աշխատակիցները կասեցրել էին Հայաստանի երկու քաղաքացիների՝ Վրաստանում հարստացված ուրանի իրացման փորձը։ 2010թ. ապրիլին նշված գործարքին մասնակցության կասկածանքով Հայաստանի ազգային անվտանգության մարմինների կողմից ձերբակալվել է Հայաստանի քաղաքացի Գարիկ Դադայանը, ում նկատմամբ քրեական գործ է հարուցվել ռադիոակտիվ նյութերի մաքսանենգության գործով։ Վրացական կողմի հաղորդմամբ, մաքսանենգներին հաջողվել էր Երևանից Թբիլիսի ուղևորվող գնացքով անցկացնել 18 գրամ հարստացված ուրան։