ՀՅԴ Արցախի Կենտրոնական կոմիտեի հայտարարությունը`ՀՀ և Ադրբեջանի նախագահների հանդիպման կապակցությամբ

ՀՅԴ Արցախի Կենտրոնական կոմիտեն սույն թվականի հունիսի 24-ին ղարաբաղա-ադրբեջանական հակամարտության հարցով Ռուսաստանի Դաշնության նախագահի միջնորդությամբ Հայաստանի Հանրապետության և Ադրբեջանի Հանրապետության նախագահների` Կազանում կայանալիք հանդիպման առիթով հանդես է գալիս հետևյալ հայտարարությամբ.

 Գնահատելով ԵԱՀԿ Մինսկի խմբի համանախագահների ջանքերը ղարաբաղա-ադրբեջանական հակամարտությունում խաղաղության պահպանման գործընթացում.
 Ողջունելով բանակցային գործընթացում կողմերին առաջարկված միջազգային իրավունքի երեք հիմնարար սկզբունքները` ուժի չկիրառումը, ինքնորոշման իրավունքը և տարածքային ամբողջականությունը, և բացառելով այդ երեք սկզբունքների հիման վրա որեւէ քայլի ճշտում` առանց ԼՂՀ-ին բանակցային գործընթացում ուղղակի ներգրավման.
 Գնահատելով բանակցային գործընթացում ՀՀ դերակատարությունը, հատկապես որպես ԼՂՀ անվտանգության երաշխավորի.
 Տեղեկացված լինելով Մինսկի խմբի համանախագահների միջոցով ԵԱՀԿ-ին փոխանցված ԼՂՀ պաշտոնական դիրքորոշումներին.
 Գիտակցելով, որ փաստացի (դե ֆակտո) կայացած Լեռնային Ղարաբաղի Հանրապետության միջազգային ճանաչմամբ` որպես ինքնուրույն և անկախ պետություն, տարածաշրջանում կհաստատվի կայուն խաղաղություն, որը փաստվեց Կոսովոյի, Աբխազիայի և Հարավային Օսեթիայի միջազգային ճանաչմամբ.
 Անընդունելի համարելով միջազգային խաղաղապահ ուժերի տեղակայումը հակամարտության գոտում, այն դիտարկելով որպես ուղղակի միջամտություն ինքնիշխան և անկախ պետության ներքին գործերին.
 Անընդունելի համարելով արդեն իսկ 17 տարիներ պահպանվող խաղաղության իրական երաշխիքներից հետքայլը.
 Համոզված լինելով, որ ղարաբաղա-ադրբեջանական հակամարտության կարգավորման գործընթացում առանց ԼՂՀ լիիրավ մասնակցության, որպես բանակցող կողմ, անհնարին է առաջընթացի արձանագրում, իսկ խախտված ձևաչափով բանակցային գործընթացը չի կարող ամբողջական և վերջնական լուծում առաջարկել.
 Առաջնային համարել և բանակցային գործընթացի հիմք ընդունել Արցախի ժողովրդի հանրաքվեներով արտացոլված ազատ կամքի արտահայտությունները.
 Անհրաժեշտություն համարելով, որ ԵԱՀԿ Մինսկի խմբի համանախագահները և այլ միջնորդական առաքելությունները պետք է իրնց ջանքերը ներդնեն ղարաբաղա-ադրբեջանական հակամարտության ոչ թե հետևանքների, այլ հրահրված պատերազմի հիմնական պատճառների վերացման ուղղությամբ, որը առանցքային հարց չի դիտվել մինչ այժմ տեղի ունեցած գորընթացներում.
 Հավատացած լինելով, որ ԼՂՀ ժողովուրդը ինչպես աշխարհի բոլոր ժողովուրդները, իրավունք ունի ինքնուրույն տնoրինելու իր ճակատագիրը և իր երկրի ապագան.
 Վստահ լինելով, որ իրավունքի համար արդարացի պայքարի հաղթանակը կանխորոշված է, իսկ մեր երկրի անկախության ճանաչման գորընթացը անշրջելի.

ՀՅԴ Արցախի կենտրոնական կոմիտեն վերոնշյալ բոլոր հիմնավորումներից ելնելով՝
ա) Վերահաստատում է իր վճռակամությունը արցախյան ազատագրական պայքարը վերջնական հանգրվանին հասցնելու համար:
բ) Կոչ է անում համանախագահներին ու միջնորդական առաքելություն իրականացնող բոլոր կողմերին` զերծ մնալ ստեղծված հավասարակշռությունը և խաղաղությունը խաթարող քայլերից: